ՀՀԿ-ն ճիշտ էր, Փաշինյանի թիմը՝ «անփույթ եւ անգրագետ»

ՀՀԿ-ական պատգամավորները, չնայած հնչեցրած քնադատություններին, այսօր կողմ քվեարկեցին Քրեական օրենսգրքում և այլ օրենքներում փոփոխություններ կատարելու փաթեթին: Դրանով, հիշեցնենք, քրեականացվում է ընտրակաշառք տալն ու ստանալը, խստացվում են ընտրակխախտումների դեպքում պատիժները: Բանն այն է, որ կառավարությունն ընդունել էր ՀՀԿ-ականների կողմից ներկայացված առաջարկները։ Արդարադատության նախարարի առաջին տեղակալ Արթուր Հովհաննիսյանն ասաց, որ նախագծում փոխել են մի շարք թրույթներ, մասնավորապես ամենախնդրահարույթներից մեկը, երբ քրեական պատիժ էր սահմանվում քվեարկության արդյունքի գաղտնիքը շահադիտական նպատակներ ունենալով կամ նախապես տրված խոստման հիման վրա բացահայտելու համար: Սա տարընթերցումների տեղիք էր տալիս, որովհետեւ հարց է, թե նախապես տրված խոստում ասելով՝ ի՞նչ կհասկանան կիրառողները: Հիմա «նախապես տրված խոստման» հիման վրա ձեւակերպումը հանվում է, պետք է շահադիտական նպատակ ունենա անձը եւ քվեարկության արդյունքը լուսանկարահանման, տեսաձայնագրման կամ փաստաթղթի միջոցով բացահայտի, որ դրա համար պատժվի: Խնդրահարույց էր նաեւ կաշառք տալու առաջարկն ընդունելու ձեւակերպումը, հարց էր առաջանում, թե ո՞նց հասկանան, առաջարկն ընդունե՞լ են, թե՞ ոչ, աչքերի՞ց, դեմքի արտահայտությունի՞ց: Ուժի մեջ է մնում նախկին ձեւակերպումը՝ կաշառք տալը եւ կաշառք ստանալը քրեորեն պատժելի է: Փոխնախարարն ասաց, որ նախագծով ընտրակաշառքի սանկցիան 3000-ապատիկից 4000-ապատիկ էին նշել, մինչդեռ Քրեական օրենսգիրքը տուգանք պատժատեսակի առավելագույն շեմը սահմանում է 3000-ապատիկը, այսինքն երկրորդ ընթերցման ժամանակ դա փոխում են եւ տուգանքը սահմանվում է 2,5-3 մլն դրամ: ԱԺ պետաիրավական հարցերի հանձնաժողովի նախագահ Գեւորգ Կոստանյանը հավաստեց, որ իսկապես, բոլոր մտահոգությունները փարատված են։ Նա հորդորեց բոլորին կողմ քվեարկել նախագծին: «Ելք» խմբակցության պատգամավոր Էդմոն Մարուքյանն ասաց, որ ինքն առաջարկ է արել քվեաթերթիկն ընտրատեղամասից դուրս հանելու վերաբերյալ. «Երբ դատարկ քվեաթերթիկը դուրս ես հանում, տալիս ես ընտրակեղծիքների կազմակերպիչներին, նրանք դա քվեարկած տալիս են ընտրողներին: Խոսքը վերաբերում է կարուսելին: Առաջարկել եմ, որ քվեաթերթիկի դուրս հանումը քրեականացվի, սակայն դրա մասին չխոսվեց: Մարդիկ իրազեկված չեն, պետք է իմանան, որ դա փաստաթուղթ է եւ փաստաթուղթը դուրս բերելը պատժելի է, չի կարելի դատարկ քվեաթերթիկը դուրս հանել ընտրատեղամասից, դա նույնպես կարող է հանգեցնել քրեական պատասխանատվության»: Արփինե Հովհաննիսյանը շնորհակալություն հայտնեց կառավարությանը՝ համատեղ աշխատանքի համար. «Կառավարությունը դրսեւորեց բարձր պրոֆեսիոնալիզմ, ադեկվատություն եւ արձագանքեց այն իրավական մտահոգություններին, որոնք մենք ունեինք եւ նախագիծը դարձավ իրավաբանորեն ճիշտ ու գրագետ»: Հիշեցնենք, որ ԱԺ պետաիրավական հանձնաժողովի նիստում էլ հանձնաժողովի ՀՀԿ խմբակցության ներկայացուցիչները ջածջախիչ քննադատության ենթարկեցին նախագիծը՝ այն համարելով «փնթի, անփույթ» իրավական տեսանգյունից ոչ գրագետ, նրանց միացան նաեւ ԲՀԿ-ական պատգամավորները, մասնավորապես Գեւորգ Պետրոսյանը։ Նրանք ամեն ինչ արեցին ցույց տալու համար, որ նոր կառավարությունում պրոֆեսիոնալ մասնագետներ չկան, որոնք կարող էին գրագետ նախագիծ ուղարկել։ Եւ ահա, ՀՀԿ-ն պարզվում է չէր սխալվում, կառավարությունը հաշվի է առել բոլոր դիտողությունները ՝իր հերթին խորհրդարանական մեծամասնությանը թույլ չտալով խուսանավել օրենքն ընդունելուց։ Անի Սահակյան