Վրաստանի Պասանաուրի գյուղի մոտակայքում վթարից տուժած հայերից մեկը մահացել է

Սեպտեմբերի 8-ին, ժամը 16:14-ին Վրաստանի ՆԳՆ ԱԻ դեպարտամենտի օպերատիվ հերթապահից «911» ծառայությանը տեղեկություն է հաղորդվել, որ ժամը 14:20-ին Վրաստանի Դուշեթի շրջանի Պասանաուրի գյուղի մոտակայքում տեղի է ունեցել ՃՏՊ, բախվել են «MAN» մակնիշի բեռնատարը (վարորդը՝ Գոռ Խաչատուրյան, ծնված 1989 թ., ՀՀ քաղաքացի) և «Samara» մակնիշի ավտոմեքենան (վարորդը՝ Ստեփան Կիրակոսյան, ծնված 1963 թ., ՌԴ քաղաքացի): Հայաստանի Արտակարգ իրավիճակների նախարարության տեղեկացմամբ` «Samara» մակնիշի ավտոմեքենայի վարորդը մահացել է, իսկ ուղևորները՝ ՌԴ քաղաքացիներ Ստեփան Կիրակոսյանը (ծնված 2015 թ.), Սուսաննա Ավետիսյանը (ծնված 1989 թ.) և Դավիթ Կիրակոսյանը (ծնված 1988 թ.), տեղափոխվել են Դուշեթիի հիվանդանոց: Սուսաննա Ավետիսյանն այնուհետև տեղափոխվել է Թբիլիսի քաղաքի «Կինեո» ԲԿ, իսկ Ստեփան Կիրակոսյանը՝ «Ցիցիշվիլի» ԲԿ: Բժիշկները Ստեփան Կիրակոսյանի առողջական վիճակը գնահատել են կայուն ծանր, իսկ Սուսաննա Ավետիսյանինը և Դավիթ Կիրակոսյանինը՝ կայուն: Այս տեղեկությունը փոխանցվել է ՀՀ ԱԻՆ ՓԾ Ճգնաժամային կառավարման ազգային կենտրոնի Արտաքին գործերի նախարարության և Առողջապահության նախարարության ներկայացուցիչներին: