Նախորդ իշխանությունների հետ «լեզու էին գտնում», կարողանում էին աշխատել.սա նույնպես «կայուն վիճակ էր»

Մոսկվայի հայ գործարարների հետ Նիկոլ Փաշինյանի հանդիպմանը գործարար Ռուբեն Վարդանյանի բարձրացրած հարցերն իսկապես գործնական հարցեր են: Հայ գործարարներից նրանք, ովքեր նախորդ իշխանությունների հետ ՛՛լեզու էին գտնում՛՛, կարողանում էին աշխատել: Սա նույնպես ՛՛կայուն վիճակ էր՛՛, կայունության իր չափանիշներով: Ճիշտ է՝ այս կայունության մեջ սուբյեկտիվ տարրը շատ մեծ էր: Ոմանք, ինչպես հիմա ասում են, ՛՛քցվեցին՛՛, այսինքն ինչ որ փուլից գտնված լեզուն շեղվեց՝ կամ կուրատոր պաշտոնյան փոխվեց և նոր պահանջներ դրեց, կամ գործարարը որոշեց շեղվել և նոր պայմաններ թելադրել, կամ հենց սկզբից խաբել էին ևլն: Հիմա Ռուբեն Վարդանյանի հարցն օրինաչափ է, բայց իմ կարծիքով ոչ լրիվ ձևակերպված: Ոչ լրիվ՝ էթիկական նկատառումներով: Մարդիկ չեն հավատում, որ Հայաստանում գործարարության համար կայուն վիճակը օրենսդրական դաշտն է լինելու, հատկապես, որ այն ակնհայտորեն փոփոխվում է և պիտի փոփոխվի, իսկ օրենսդիր մարմինն էլ գործադիրի հետ առայժմ համաքայլ չէ: Մյուս կողմից Հայաստանում և Հայաստանի հետ ըստ նրանց փորձի գործարարության հաջողության երաշխիքը ՛՛լեզու գտնելն է՛՛, ինչպես ի դեպ նույն փորձն ունեն Ռուսաստանում: Հիմա այս մարդիկ ուզում են հասկանալ՝ ու՞մ հետ պիտի ՛՛լեզու գտնեն՛՛: Հասկանալի է, նրանց նախկին ներդորւմները նույնպես այդ փորձի շրջանակներում է, և հիմա եկել է նոր իշխանություն ու նոր պայմաններ է թելադրում: Սա արդեն իսկ անկայունություն է: Հասկանալի է, որ այդ հարցերը ՛՛բաց ֆորմատով՛՛ չեն կարող հնչեցնել, մյուս կողմից էլ դեռևս վստահ չեն ՛՛նոր Հայաստանում՛՛ հայտարարված պայմաններին, չգիտեն նաև իրենց գործող ծրագրերի ապագան: Վաղը մյուս օրը ԱԱԾ-ն կարող է այնտեղ էլ ապօրինություններ հայտնաբերել, ի՞նչ անեն, եթե գործել են նախկին ՛՛կայունության՛՛ պայմաններում, իսկ նոր կայունությունն էլ դեռևս հաղթահարված չէ: Հրանուշ  Խառատյանի  գրառումը