Քարոզարշավից առաջ ցանկացած օգնություն չի դիտարկվում որպես ընտրակաշառք. «Իմ քայլը»

Երևանի ավագանու ընտրությունների քարոզարշավի պաշտոնական մեկնարկից առաջ պաստառներ փակցնելը օրենքի խախտում չէ: «Արմենպրես»-ի փոխանցմամբ՝ «Իմ քայլը» դաշինքի ավագանու թեկնածուների սեպտեմբերի 9-ին տեղի ունեցած  մամուլի ասուլիսում այս մասին նշեց դաշինքի ցուցակի առաջին համար Հայկ Մարությանը: Պատասխանելով լրագրողի հարցին, թե արդյոք օրենքի խախտում չէ, որ քարոզարշավի մեկնարկից առաջ արդեն մայրաքաղաքում դաշինքի նախընտրական պաստառներ կան փակցված, Մարությանը նշեց, որ դա զուտ տեխնիկական հարց է: «Ընդհանրապես ոչ մի օրենքի խախտում չկա: Մեր դեպքում սա ընդամենը տեխնիկական հարց է, քանի որ պետք է հասցնեինք բոլոր պաստառները փակցնել: Այն ընկերությունը, որը փակցնում է դրանք, փակցնելու աշխատանքները սկսել է 2 օր առաջ, բայց ավարտելու է այն 4 օր անց: Վերջին պաստառը փակցվելու է ամսի 14-ին»,- ասաց Մարությանը: Դաշինքից ավագանու թեկնածու Գայանե Աբրահամյանը հավելեց, որ այստեղ օրենքի բաց կա: «Օրենքը սահմանում է, որ քարոզչություն իրականացնել չի կարելի միայն ընտրության օրը և ընտրության նախորդող օրը: Այսպես է նաև ընտրակաշառքի պարագայում, քանի որ քարոզարշավից առաջ ցանկացած օգնություն կամ աջակցություն չի դիտարկվում որպես ընտրակաշառք»,-  ընդգծեց Աբրահամյանը: Մարությանն անդրադարձավ նաև այս օրերին հեռուսատեսությամբ ցուցադրվող իր մասնակցության ֆիլմերին: Քաղաքապետի թեկնածուն ասաց, որ դրանց ցուցադրումն իրենից կախված չէ։ Մարությանը նշեց, որ քարոզարշավի պաշտոնական մեկնարկից հետո իրենք ամեն օրը նվիրելու են մեկ վարչական շրջանի: «Ամեն օրվա վերջում վարչական շրջաններից մեկում լինելու է հանրահավաք, որտեղ մեր նախընտրական ծրագիրը ներկայացնելու եմ շատ հետաքրքիր ոճով»,-նկատեց Մարությանը: Երևանի ավագանու արտահերթ ընտրությունները տեղի կունենան սեպտեմբերի 23-ին: Ընտրությունների քարոզարշավը պաշտոնապես կմեկնարկի սեպտեմբերի 10-ին: