Հայկ Մարությանը ներկայացրեց 50 կետից կազմված ծրագիրը

Այսօր` սեպտեմբերի 9-ին  կայացավ Երեւանի ավագանու արտահերթ ընտրություններին մասնակցող «Իմ Քայլը» դաշինքի թեկնածուներ Հայկ Մարությանի, Սրբուհի Ղազարյանի, Սերգեյ Սարգսյանի, Գայանե Աբրահամյանի եւ Հրաչյա Սարգսյանի մամուլի ասուլիսը: «Իմ քայլը դաշինքի ցուցակում ընդգրկվել են այսօրվա համար տարիներ շարունակ պայքարած մարդիկ: Տասնյակ տարիներ անց մենք հնարավորություն ունենք անցկացնել ազատ ընտրություններ: Սա իրողություն դարձավ այն հեղափոխությամբ, որը կատարեց ժողովուրդը: Դաշինքի ցուցակում ընդգրկվել են մարդիկ, ովքեր տարիներ շարունակ պայքարել են արդարության համար»,- ասաց նա: Հայկ Մարությանի խոսքով`  իրենց նախընտրական ծրագիրը կազմված է շուրջ 50 կետից: Մանրամասնելով Մարությանը նշեց, որ նախատեսվում է Երեւանի քաղաքապետարանի պաշտոնական կայքում ստեղծել  հանրաքվեի բաժին, որտեղ մարդիկ մտնելու են ու քվերակելու են այս կամ այն հարցի օգտին, իսկ առավել կարեւոր հարցերի դեպքում կլինի իրական հանրաքվե: «Գծվելու է տրանսպորտի նոր ցանց եւ լինելու է երթեւեկության տոմսերի միասնական համակարգ: Երկարացվելու է երթեւեկությունը՝ մինչեւ 24:00-ն: Լինելու են նաեւ գիշերային երթուղիներ, որոնք աշխատելու են գիշերվա ժամը 3-4-ը: Նախատեսվում է մետրոյի առնվազն մեկ կայարան կառուցել: Մետրոյի 1 կայարանի 1 կմ-ն կառուցելու համար նախատեսվում է 50-100 մլն ԱՄՆ դոլար: Ոչ մի ստորակետ, ոչ մի բառ բաց չթողնեմ` կկարդամ մեր պատրաստած տեքստը»,-նշեց Երևանի քաղաքապետի թեկնածուն: