Ինչ տրամադրությամբ կվերադառնա Փաշինյանը՝ Պուտինի հետ կոշտ խոսակցությունից հետո
Փաշինյան-Պուտին հանդիպման նախօրեին Մոսկվայից, թերևս, զգալով ընդհանուր լարվածությունն ու սուր մթնոլորտը, որոշեցին փոքր-ինչ մեղմել իրավիճակը: Հայաստանում ղեկավարության փոփոխությունն ազդեցություն չի ունեցել Մոսկվայի ու Երևանի միջև ռազմատեխնիկական համագործակցության վրա, երեկ հայտարարել է ռազմատեխնիկական համագործակցության գծով Դաշնային ծառայության ղեկավար Դմիտրի Շուգաևը. «Հայաստանի հետ հարաբերությունները կառուցվում են ըստ հաստատված ծրագրի։ Այն պայմանագրերը, որոնք մենք ունենք՝ ուրեմն ունենք։ Նոր բան այս առումով ես չեմ ասի» ։ Նշենք, որ ավելի վաղ՝ մեկ օր առաջ էլ, Ռուսաստանի նախագահի օգնական Յուրի Ուշակովը նշեց, որ սեպտեմբերի 8-ին Մոսկվայում Հայաստանի վարչապետ Նիկոլ Փաշինյանի և Ռուսաստանի նախագահ Վլադիմիր Պուտինի միջև կայանալիք հանդիպմանը քննարկվելու են երկկողմ համագործակցությանը և միջազգային կառույցներում համատեղ աշխատանքին վերաբերող հարցեր. «Շատ հարցեր են կուտակվել երկու կողմում էլ, հետևապես՝ մենք ակնկալում ենք անկեղծ և լուրջ խոսակցություն բոլոր այն հարցերի շուրջ, որոնք վերաբերում են ինչպես երկկողմ համագործակցությանը, այնպես էլ միջազգային կառույցներում՝ ԵԱՏՄ-ում և ՀԱՊԿ-ում համատեղ աշխատանքին»։ Սա Փաշինյան-Պուտին երրորդ հանդիպումը կլինի մայիսից ի վեր, երբ Նիկոլ Փաշինյանը ստանձնեց Հայաստանի վարչապետի պաշտոնը: Առաջին հանդիպումը տեղի ունեցավ մայիսին Սոչիում՝ ԵԱՏՄ ղեկավարների գագաթնաժողովի շրջանակներում: Երկրորդ անգամ երկու երկրների ղեկավարները հանդիպեցին հունիսին Մոսկվայում՝ ֆուտբոլի աշխարհի առաջնության բացմանը: Այս ընթացքում Պուտինը և Փաշինյանը նաև երեք հեռախոսազրույց են ունեցել: Իրականում, վաղը Փաշինյանի և Պուտինի առաջին լիարժեք բանակցությունները կլինեն՝ ծանոթությունից հետո: Այսինքն, կլինեն կոնկրետ, առարկայական բանակցություններ: Հենց Մոսկվայից հնչող հայտարարությունները հիմք ընդունելով կարելի է արձանագրել, որ Հայաստան-Ռուսաստան հարաբերություններում կոնկրետ խնդիրներ կան, ու դրանք արագ լուծման են սպասում, այլապես իրավիճակը կարող է արդեն լուրջ բարդություններ առաջ բերել: Այսինքն, արձանագրենք, որ թե՛ Երևանում, թե՛ Մոսկվայում լուրջ ակնկալիքներ կան վաղը կայանալիք Փաշինյան-Պուտին հանդիպումից: Հարաբերություններում անորոշությունը ու հայտարարություններն արդեն որոշակի մտահոգություն են առաջացնում: Այս առումով Փաշինյանի թիմի որոշ ներկայացուցիչների հայտարարությունները, թե՝ «որևէ անհանգստանալու բան չկա, երկու երկրների հարաբերությունները լավ մակարդակում են», մեղմ ասած տարօրինակ են, եթե չասենք՝ անհասկանալի: Անտեսել Ռուսաստանի հնչող մեկնաբանությունների սրությունը ու դրանց ծաղրով պատասխանելը՝ դուրս է տրամաբանությունից ու հղի վտանգներով Հայաստանի ու Արցախի համար: Թամար Բագրատունի
Հետևեք մեզ Viber-ում
