Կա բժիշկների տված էպիկրիզ․ պաշտպան

ԱԺ նախկին պատգամավոր, գեներալ Մանվել Գրիգորյանի առողջական վիճակում որևէ փոփոխություն չկա, նա գտնվում է մեկուսարանում։ Այս մասին «Առաջին լրատվական»-ի հետ զրույցում հայտնեց գեներալի փաստաբան Լևոն Բաղդասարյանը։ «Ըստ էության Մանվել Գրիգորյանը տառապում է մի քանի հիվանդություններով, ստանում է դեղորայքային բուժում, ստանում է ինսուլին: Նա այնպիսի հիվանդություններով է տառապում, որ ինտենսիվ պետք է բուժում ստանա»,- ասաց Բաղդասարյանը, ապա ավելացրեց՝ իրենք բազմիցս հայտարարել են, որ Գրիգորյանի հիվանդություններն անհամատեղելի են կալանքի հետ։ Հարցին՝ ինքնազգացողության կտրուկ վատացում եղե՞լ է, պաշտպանը նշեց․ «Կարող է լինել, հիվանդ մարդու մոտ ամեն ինչ էլ կարող է լինել: Համենայն դեպս բուժում ստանում է»։ Ի դեպ՝ նշանակվել է դատաբժշկական փորձաքննություն և պաշտպանի տեղեկացմամբ՝ դրա պատասխանը դեռևս չի ստացվել ու դժվարացավ ասել՝ երբ կլինի։ «Բայց կա բժիշկների տված էպիկրիզը, որտեղ նշված է, որ տառապում է ծանր հիվանդությամբ։ Փորձաքննության արդյունքում տեղական բժիշկներն են ուսումնասիրել ու եզրակացություն տվել»։ Նշենք, որ Մանվել Գրիգորյանի պաշտպանական թիմը կալանքը որպես խափանման միջոց փոփոխելու վերաբերյալ վճռաբեկ բողոք էին ներկայացրել, սակայն Մանվել Գրիգորյանի կալանքը ևս երկու ամսով երկարաձգվել է։