Ամենագլխավոր հարցը, որը Փաշինյանը կտա Պուտինին

Մինչ Հայաստանում բոլորը շունչները պահած սպասում են երկու օրից կայանալիք Փաշինյան-Պուտին հանդիպմանը, պաշտոնական Մոսկվան շարունակում է լարված պահել հանդիպումից առաջ մթնոլորտը: Ռուսաստանի նախագահ Վլադիմիր Պուտինը և Հայաստանի վարչապետ Նիկոլ Փաշինյանը սեպտեմբերի 8-ի հանդիպման ընթացքում կքննարկեն երկկողմ համագործակցությանը և միջազգային կառույցներում համատեղ աշխատանքին վերաբերող հարցեր, այս մասին ՏԱՍՍ գործակալության փոխանցմամբ հայտարարել է ՌԴ նախագահի օգնական Յուրի Ուշակովը: «Սեպտեմբերի 8-ին նախատեսված է մեր նախագահի աշխատանքային հանդիպումը Հայաստանի Հանրապետության վարչապետ Նիկոլ Փաշինյանի հետ», - վերահաստատել է Ուշակովը, հիշեցնելով, որ երկու առաջնորդները արդեն երկու անգամ բանակցություններ են անցկացրել՝ մայիսին Սոչիում, հունիսին՝ Մոսկվայում, ինչպես նաև երեք անգամ հեռախոսազրույց ունեցել: «Շատ հարցեր են կուտակվել ինչպես մեր կողմից, այնպես էլ հայկական, դրա համար մենք ակնկալում են անկեղծ և լուրջ խոսակցություն բոլոր այն հարցերի շուրջ, որոնք վերաբերում են ինչպես երկկողմ համագործակցությանը, այնպես էլ միջազգային կառույցներում համատեղ աշխատանքին՝ ԵԱՏՄ-ում և ՀԱՊԿ-ում»,- Ուշակովի խոսքերն է մեջբերում ՏԱՍՍ գործակալությունը: Ուրեմն, Մոսկվան ակնկալում է Պուտինի և Փաշինյանի միջև անկեղծ և լուրջ զրույց ու արձանագրվում է, որ Մոսկվայում կքննարկեն կուտակված հարցեր... Ասել է թե՝ բավական հարցեր են կուտակվել, ընդ որում՝ թե՛ Մոսկվայում, թե՛ Երևանում: Սա էլ իրենց հերթին են շեշտում: Փորձենք հասկանալ, ինչ հարցեր են կուտակվել: Ռուսաստանում, թե ինչ հարցեր են կուտակվել՝ այդ մասին արդեն պարզ է՝ ՀԱՊԿ-ին ու ԵԱՏՄ-ին Հայաստանի անդամակցության հարցերը և իհարկե՝ Հայաստանի ներքաղաքական իրավիճակը, որը Լավրովը վերջերս «անհանգստացնող» ու «թեժ» որակեց: Այստեղ, բոլորի համար պարզ է խոսակցության նյութը՝ Ռոբերտ Քոչարյանի նկատմամբ Մարտի 1-ի գործով քրեական գործը, ինչպես նաև Միքայել Հարությունյանի և Յուրի Խաչատուրովի: Վերջին դեպքում, որպես ՀԱՊԿ-ում գլխավոր քարտուղարի պաշտոնի կրող, արդեն իսկ մեկ անգամ արտահայտվեց Բելառուսի նախագահ Ալեքսանդր Լուկաշենկոն, ինչից կարելի է ենթադրել, որ Հայաստանի կողմից մյուս թեկնածուի ներկայացումը ՀԱՊԿ գլխավոր քարտուղարի պաշտոնում՝ ուղղակի հարցականի տակ է: Ռուսաստանի կողմից տրվող հարցերը՝ պարզ են: Եթե այս ամենին էլ գումարենք Արցախի խնդիրը, այն ակնկալիքները, որը Փաշինյանի նոր կառավարությունից ունի Ադրբեջանը, հնարավոր է խոսակցությունն էլ այս դաշտում լինի բավական լուրջ ու հետևանքների առումով նույնիսկ անկանխատեսելի: Հիմա հարցը՝ իսկ ինչ հարցեր ունի Նիկոլ Փաշինյանը Պուտինին... Այստեղ պատասխանը պարզ է՝ գլխավոր հարցը մեկն է. սեփական իշխանության նկատմամբ գոնե լոյալություն, որը ստանալը, ըստ ամենայնի այնքան էլ հեշտ չի լինելու, եթե չասենք՝ բավական դժվար է լինելու: Հաշվի առնելով, այն հանգամանքը, որ ի տարբերություն նախորդների, Փաշինյանն ամենաբուռն ձևով է ուղերձներ է հղում Պուտինին, հավատարմության հակվածություն ցույց տալիս, ու փորձում է սիրաշահել Պուտինին, պարզ է, որ Փաշինյանը Պուտինի աչքում «մերոնքական» երևալու գերխնդիր ունի լուծելու: Կարողանալո՞ւ է Փաշինյանը ռազմաքաղաքական հարցերով Ռուսաստանից ստանալ աջակցություն, այնպիսի աջակցություն, որը Հայաստանում բոլոր ուժերը կընդունեն ի գիտություն: Թամար Բագրատունի