ՌԴ-ն Սիրիայից դուրս է եկե՞լ, թե ոչ, արդյունավե՞տ էր Մոսկվայի մեկուսացումը
Քերին Մոսկվայում կքննարկի Սիրիայի հարցը ԱՄՆ պետքարտուղար Ջոն Քերին Մոսկվա կայցելի մարտի 22-25-ը` քննարկելու Սիրիայում և Ուկրաինայում տիրող իրավիճակները։ «ԱՄՆ պետքարտուղար Ջոն Քերին մարտի 22-25-ը կայցելի Մոսկվա, որտեղ կհանդիպի ռուսական ղեկավարության հետ»,- հայտնել է Պետդեպի մամլո ծառայությունը։ «Կողմերը կքննարկեն ԴԱԻՇ-ի հետ պայքարին զուգահեռ Սիրիայի աջակցության միջազգային խմբի շարունակվող ջանքերը՝ ուղղված կրակի դադարեցման ռեժիմի աջակցմանը, մարդասիրական օգնության մատակարարումներին ու դրանց ընդլայնմանը, Սիրիայում քաղաքական անցմանն աջակցությանը»,- նշվում է հաղորդագրությունում։ Պետքարտուղարը մտադիր է նաև ռուսական կողմի հետ քննարկել Ուկրաինային առնչվող հարցեր և Մինսկի համաձայնագրերի իրագործման անհրաժեշտությունը՝ նշում են Պետդեպում։ Մինչ Քերին կայցելի Ռուսաստան, ողջ աշխարհը քննարկում է հարցը` Ռուսաստանը Սիրիայից դուրս է եկել, թե՞ չի եկել... Այսօր կարծես, միանշանակ չէ, որ Ռուսաստանը հեռացել է Սիրիայից, և ոչ ոք չի կարող բացառել, որ Ռուսաստանը կրկին կարող է զորք մտցնել Սիրիա, մանավանդ, որ այն խնդիրները, որոնք Ռուսաստանն իր առաջ դրել էր, չհաջողվեց։ Ամերիկյան մասնավոր հետախուզա-վերլուծական Stratfor ընկերությունը հրապարակել է լուսանկարներ տիեզերքից, որոնք արվել են մարտի 17-ին, և որոնցում երևում է Լաթաքիայում ռուսական ավիաբազան, ինչպես նաև Տարտուս նավահանգիստը։ Լուսանկարները ցույց են տալիս, որ մարտի 17-ի ցերեկվա դրությամբ ռուսական ավիախմբի ավելի քան 1/4-ը լքել է Սիրիան։ Stratfor-ի տվյալներով՝ մարտի 15-ին թռչել են 3 «Սու-34» ինքնաթիռներ և տրանսպորտային «Տու-154»-ը, մեկ օր անց՝ բոլոր 12 «Սու-25»-երն ու տրանսպորտային «Իլ-76»-երի մի մասը։ Լուսանկարներում երևում են «Սու-24» ինքնաթիռներ, սակայն, հավանաբար, դրանք լքել են բազան լուսանկարներն արվելուց հետո՝ նշում է գործակալությունը։ Սակայն Stratfor-ը հայտնում է, որ Ռուսաստանը վերջին օրերին ավիաբազայում հավելյալ ուղղաթիռներ է տեղակայել։ «Լուսանկարները ցույց են տալիս, որ ռուսները ոչ միայն ընդլայնում են ենթակառուցվածքն ու օբյեկտներն ավիաբազայում, այլև այն, որ նրանք հավելյալ ակտիվներ են տեղակայել վերջին մի քանի օրերին։ Դրանք ներառում են «Մի-28» և «Կա-52» ռազմական ուղղաթիռներ»,- ասվում է հաշվետվությունում։ Բացի այդ, գործակալությունը նշում է, որ Ռուսաստանը դեռևս դուրս չի բերել իր «Սու-30» և «Սու-35» ինքնաթիռները։ ՌԴ գործողությունները սպառնում են միջազգային աշխարհակարգին Ռուսաստանի որոշ գործողություններ, որոնք ձեռնարկվել են վերջին շրջանում, սպառնում են միջազգային աշխարհակարգին, «Մոսկովսկի կոմսոմոլեցին» տված հարցազրույցում նշել է ժողովրդավարության, մարդու իրավունքների ու աշխատանքային հարաբերությունների հարցերով ԱՄՆ պետքարտուղարի օգնական Թոմ Մալինովսկին։ Նրա խոսքով՝ աշխարհում գոյություն ունի այդ առնչությամբ լայն միջազգային կոնսենսուս. «Ուժեղ և հաջողակ Ռուսաստանի գոյությունը, որը ճանաչում է օրենքի գերակայությունը, որը հարգում է իր հարևանների ինքնիշխանությունն ու տարածքային ամբողջականությունը, և որը դրական ներդրում է անում համաշխարհային գործերում, բխում է ողջ աշխարհի շահերից»։ Պետքարտուղարի օգնականը նաև ընդգծել է, որ Վաշինգտոնը երբեք չի վարել հակառուսական քաղաքականություն։ Նրա խոսքով՝ ԱՄՆ-ը շահագրգռված է, որ Ռուսաստանը լինի ուժեղ և ժողովրդավարական երկիր։ Մալինովսկին հավելել է, որ Մոսկվան ու Վաշինգտոնը կարող են միասին աշխատել՝ հանուն գլոբալ անվտանգության ու բարգավաճման ապահովման։ Իսկ ՄԱԿ-ում ԱՄՆ մշտական ներկայացուցիչ Սամանտա Փաուերը հարցազրույց է տվել «Ամերիկայի ձայնի» ուկրաինական ծառայությանը, որում նշել է, որ Ռուսաստանի դեմ սահմանված պատժամիջոցները Ղրիմի անօրինական բռնակցման համար չեն հանվի այնքան ժամանակ, քանի դեռ Ղրիմը չի վերադարձվի Ուկրաինային։ «Մենք երբեք չեն ճանաչի Ռուսաստանի գործողությունները։ Գիտեմ, որ շատերին դրանք կարող են պարզապես խոսքեր թվալ, սակայն մեկուսացման նման ձևն ու դատապարտումն ունեն արդյունավետության պատմական օրինակներ՝ ընդդեմ պետությունների անօրինական ու ագրեսիվ գործողությունների»։ Փաուերի խոսքով՝ իրենք եկել են այն եզրակացության, որ զենքով օգնությունն ուկրաինացիներին աղետալի կլինի բոլորի համար։ Նա նշել է, որ դա Պուտինի ընտրած մոտեցումն է՝ բավարարելու համար Ուկրաինայի հետ կապված իր հավակնությունները։ «Սակայն եթե մենք փորձենք գերազանցել Պուտինին ռազմականացմամբ, դա կնշանակի ավելի մեծ վնաս հասցնել ուկրաինացի ժողովրդին, որն առանց այդ էլ արդեն տուժել է այս հակամարտությունից։ Ես հասկանում եմ, որ շատերը հիասթափված են նման իրավիճակից, սակայն մենք ցուցաբերում ենք ոչ մահաբեր մեծ օգնություն»,- ասել է նա։ «Վստահ եմ՝ ժամանակը ցույց կտա Ռուսաստանի դեմ ուղղված մեկուսացման քաղաքականության արդյունավետությունը։ Արդեն հիմա տեսանելի է տնտեսական ու քաղաքական գինը, որը վճարում է Ռուսաստանն այն բանի համար, որ 21-րդ դարում իրեն դրսևորում է ինչպես 19-րդ դարում»,- ասել է Փաուերը՝ նշելով, որ վերջերս է տեսել վիճակագրությունը, համաձայն որի՝ 2013 թվականին Ռուսաստանի տնտեսությունը կազմել է ԱՄՆ տնտեսության 1/8-րդ մասը, իսկ հիմա՝ 1/16-րդ։ «Նման իրավիճակը չի կարող լավ լինել ռուսական էլիտայի, երկրի կառավարության ու նախագահ Պուտինի համար»,- ասել է Փաուերը։ Թամար Բագրատունի