Սամվել Ֆարմանյանի ակնարկը իշխանությանը (video)

ՀՀԿ-ական պատգամավոր Սամվել Ֆարմանյանը կարծում է, որ անցումային արդարադատություն ստեղծելու վերաբերյալ կառավարությունը չունի բավարար հիմնավորումներ: Այսօր խորհրդարանում լրագրողների հետ զրույցում Ֆարմանյանն ասաց, որ իր կարծիքով՝ այդ գաղափարի շուրջ հնարավոր կլինի հիմնավոր տեսակետ հայտնել միայն այն բանից հետո, երբ գործադիր իշխանությունը կներկայացնի անցումային արդարադատության անհրաժեշտության հիմնավորումը: Նա անդրադարձավ նաևհայ-ռուսական հարաբերություններին և վարչապետ Նիկոլ Փաշիյանի՝ երրորդ անգամ ՌԴ նախագահի հետ հանդիպման գնալուն: «Մենք մեր մտահոգությունն ենք հայտնել Հայաստան-Ռուսաստան հարաբերություններում Նիկոլ Փաշինյանի վարչապետության օրոք տեղ գտած իրողությունների առթիվ: Ես հուսով եմ, որ բոլոր գործողությունները, որոնք մեր իշխանությունների կողմից ձեռնարկվում են կամ կձեռնարկվեն, դրանք կբխեն բացառապես Հայաստանի Հանրապետության ազգային պետական երկարատև շահերից, նախկին փորձի համակողմանի ուսումնասիրությունից բխող որոշումներ կլինեն: Եվ ի վերջո, գուցե մի օր վերանան նաև այն խութերը, մտահոգությունները, որոնք արտահայտում ենք ոչ միայն ես ու իմ շատ գործընկերներ, այլ շատ անաչառ փորձագետներ: Ես դեռ վաղուց իմ ելույթով ակնարկել եմ գործող իշխանություններին, որ քաղաքական հայտարարություններն անհրաժեշտութուն ունեն միս ու արյուն ստանալու։ Ցանկացած որոշում իր մեջ խորհրդանշորեն բովանդակություն է պարունակում, և ամեն մի որոշում պետք է ծանր ու թեթև անել այն կայացնելուց առաջ»,- նշեց նա: Դիտարկմանը, որ տեսակետ կա, որ, ի տարբերություն նախորդ իշխանությունների, հիմա ՀՀ-ն ՌԴ-ի հետ հավասարը հավասարի հետ է խոսում, Սամվել Ֆարմանյանն արձագանքեց, թե ինչպիսին էլ մեր ցանկությունները լինեն, միևնույնն է, միջազգային հարաբերություններն ունեն իրենց անխախտ կանոնները, իսկ համաշխարհային պատմությունն այդ կանոնների լավագույն վկայությունն է։