Եղբայրը ՀՀԿ-ի ահու է առաջադրվել եղբոր դեմ

Իշխող կուսակցության թեթեւ ձեռքով Հայաստանում ընտրական գործընթացներն այն աստիճան են խաթարվել, որ արդեն միմյանց դեմ պատրաստ են պայքարել հարազատ եղբայրներ: Թալինում Գուրգեն եւ Գեւորգ Գրիգորյաններն այս պահի դրությամբ դեռ մրցակիցներ են: Գուրգեն Գրիգորյանը՝ 1996-2002 թթ Թալինի քաղաքապետն այս անգամ որոշել է կրկին փորձել ուժերը, բայց ոչ թե ՀՀԿ-ի կողմից, այլ Արթուր Բաղդասարյանի <<Հայկական վերածննդի>>, որին նա անդամակցել է վերջերս: Հիշեցնենք, որ Գուրգեն Գրիգորյանը, որին աջակցում էին մարզի ՀՀԿ-ականները, պարտվել է անկուսակցական Մնացական Մնացականյանին, որը հետագայում անդամակցեց ՀՀԿ-ին ու պատգամավոր ընտրվեց: Թեկնածուն իր առաջադրվելուց հետո իմացել է, որ իր մրցակիցների շարքում է ոչ ավել, ոչ պակաս հարազատ եղբայրը՝ Գեւորգ Գրիգորյանը, նա ներկայումս Թալինի քաղաքապետարանի կոմունալ ծառայության ղեկավարն է, ասել է թե՝ աշխատում է գործող քաղաքապետի ենթակայության տակ: Ընտրապայքարում թեկնածությունների շարքում է նաեւ գործող Սարգիս Արամյանը, ՀՅԴ-ն եւս թեկնածու ունի՝ ի դեմս Տիգրան Հարությունյանի, նա Թալինում ավտոտեխսպասարկման կենտրոն ունի եւ զբաղվում է բիզնեսով: Թալինում տարածված լուրերի համաձայն՝ Գեւորգ Գրիգորյանը եղբոր դեմ առաջադրվել է այն պատճառով, որ նա գործող քաղաքապետի ոչ միայն ենթական է, այլ ըստ լուրերի խնամիական հեռու կապ կա իրենց մեջ եւ նախապես եղբորը զգուշացրել է չառաջադրել թեկնածություն, սակայն հորդորներն ապարդյուն են անցել: Գեւորգ Գրիգորյանը հերքեց խնամիության մասին լուրերը.<<Ես չորս տղա ունեմ, իրանք երեք ախպեր են, մեր հարաբերությունները շատ մոտ են, բայց խնամի չենք>>: Բայց վրդովմունքը հայտնեց, որ եղբայրն առանց իր հետ խորհրդակցելու է առաջադրել թեկնածությունը.<Ես մեծ եղբայրն եմ ու եթե ինքն իմ հետ չի զրուցում, իմ քայլն էլ պիտի անակնկալ չլինի>>,- ասաց Գրիգորյանը: Նա ընդգծեց իր աշխատանքի վայրի հանգամանքը եւ անուղղակիորեն հասկացրեց, որ <<աշխատանքային կարգապահական>> հարաբերություններից ելնելով է նման քայլի գնացել.<Ընդ որում՝ ես գործող քաղաքապետին ոչ գովելու ունեմ, ոչ փնովելու, ինքը նորմալ տղա ա ու աշխատում է, հեռանկարային շարժում մարդ է>>: Գեւորգ Գրիգորյանին հարցրեցինք, առաջադրվել է, որպեսզի եղբորից ձայները <<խլի՞>> ու հետո միանա գործող քաղաքապետին.<<Չէ, ես ձայն խլող չեմ, եթե ես իմանայի, որ 100 տոկոսով անցնող եմ, կմնայի մինչեւ վերջ…>>,- ասաց Գրիգորյանը՝ չբացառելով, որ ինքնաբացարկ կներկայացնի: Գրիգորյանն ասաց , որ ինքը կսատարի գործող քաղաքապետ Սարգիս Արամյանին: Հ.Գ.-Այս պատմությունը եւս մեկ անգամ փաստում է այն տխուր իրողությունը, որը ձեւավորվել է ՀՀԿ-ի շնորհիվ, փաստորեն, եղբայրը եղբորը կուրանա, միայն  չարժանանա ՀՀԿ-ի ահեղ դատաստանին ու չկորցնի սեփական պաշտոնը: Անի Սահակյան