«Սև ամպեր» Փաշինյանի գլխավերևում՝ Պուտինի հետ հանդիպումից առաջ

Մոսկվայում ցանկանում են լսել Փաշինյանին... Հայ-ռուսական «կենացները», ինչպես ասում են՝ քաղցրանում են: Առաջիկայում նախատեսվում է Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի հանդիպումը, հայտարարել է Ռուսաստանի արտգործնախարար Սերգեյ Լավրովը։ «Առաջիկայում նախատեսվում է նախագահ Պուտինի և վարչապետ Փաշինյանի ևս մեկ հանդիպում։ Կարծում եմ, որ մեզ համար կարևոր կլինի լսել, թե ինչպես է Հայաստանի նոր առաջնորդը գնահատում իր երկրում իրավիճակի զարգացման հնարավորությունները։ Իհարկե, մեզ համար միևնույն չէ, թե այդ իրավիճակում ինչ տեսք ունեն ՀԱՊԿ-ի դիմաց Հայաստանի պարտավորությունները, մենք ելնում ենք նրանից, որ այդ պարտավորությունները գործում են, դրանք պետք է լիովին կատարել, այդ թվում այն հարցում, ինչը վերաբերում է մեր ընդհանուր կազմակերպության հեղինակությանը և վարկանիշին», — ասել է Լավրովը` ելույթ ունենալով Մոսկվայի միջազգային հարաբերությունների պետական ինստիտուտի ուսանողների առաջ։ Հիշեցնենք, որ գրեթե մեկ ամիս առաջ Սերգեյ Լավրովը նշեց, որ Հայաստանում տեղի ունեցող իրադարձությունները հակասում են երկրի նոր ղեկավարության այն հայտարարություններին, թե հրաժարվել են նախորդ իշխանության նկատմամբ քաղաքական հետապնդումից։ Փաշինյանն էլ իր հերթին մեկնաբանելով Լավրովի խոսքերը, հայտարարել էր, որ ռուս գործընկերները պետք է ադապտացվեն Հայաստանում ստեղծված նոր իրավիճակին։ Հիմա Սերգեյ Լավրովի խոսքով՝ Մոսկվան մտահոգ է Հայաստանում ծավալված իրադարձությունների առթիվ, բայց և այնպես, տեղի ունեցող զարգացումները նա որակում է որպես երկրի ներքին գործ: «Իհարկե մեզ մտահոգում է այն հանգամանքը, որ իրադրությունը Հայաստանում շարունակում է թեժ մնալ, հետաքննվում են տասնամյա վաղեմության իրադարձությունները, գիտեք այդ փաստերի, տեղի ունեցած ձերբակալությունների մասին: Անկասկած, մենք դա համարում ենք Հայաստանի Հանրապետության ներքին գործը և շատ ենք ցանկանում, որպեսզի այդ ներքին գործերը մնան օրենքի և Սահմանադրության ամուր հիմքի վրա ու արագորեն հաղթահարվեն», - ասել է Լավրովը: Երեկ՝ սեպտեմբերի 2-ին, ֆեյսբուքյան հարցուպատասխանի ընթացքում Նիկոլ Փաշինյանը հայտնեց, որ առաջիկայում կայցելի Ռուսաստան. «Առաջիկայում նախատեսված է իմ այցը Մոսկվա, որտեղ հանդիպում կունենամ Ռուսաստանի Դաշնության նախագահ Վլադիմիր Պուտինի հետ, և ես համոզված եմ, որ մենք մեր հարաբերությունների օրակարգի բազմաթիվ հարցեր մանրամասն կքննարկենք և լուծումներ կտանք բազմաթիվ հարցերի: Իհարկե ես չեմ ուզում պնդել, թե բոլոր հնարավոր հարցերը կլուծենք, կվերջացնենք, բայց ես վստահաբար ասում եմ, որ մեր բնականոն համագործակցությունը շարունակվում է, և համոզված եմ նաև, որ բնական կերպով կշարունակվի»։ Փաշինյան-Պուտին հանդիպումը կայանալու է ուշագրավ մթնոլորտում, եթե չասենք՝ բավական ծանր մթնոլորտում՝ Փաշինյանի համար: Ակնհայտորեն Մոսկվան զայրացած տոնով է խոսում, ցույց տալով, որ Փաշինյանից պարզաբանումներ են ակնկալում՝ մի շարք հարցերով: Փաշինյան-Պուտինը հանդիպումը կայանալու է այնպիսի պայմաններում, երբ ՀՀ նախկին նախագահ Ռոբերտ Քոչարյանի հեռացումից հետո առաջին անգամ Մոսկվան պաշտոնապես շնորհավորեց նրա ծննդյան տարեդարձը: Սա ոչ ավել, ոչ պակաս ապտակ էր Փաշինյանի իշխանության համար, կոնկրետ ուղերձ: Ավելին, Մոսկվան հարկ համարեց հավելել, որ չեն պատրաստվում արտահանձնել Հայաստանի նախկին պաշտպանության նախարար Միքայել Հարությունյանին արտահանձնելու վերաբերյալ: «Ինտերֆաքս»-ը՝ հղում անելով սեփական աղբյուրներին՝ օրերս հայտնեց. «ՌԴ իրավապահ մարմինները հարցում են ստացել միջազգային հետախուզման մեջ գտնվող Հայաստանի պաշտպանության նախկին նախարար Հարությունյանին արտահանձնելու վերաբերյալ. այս պահին այն գտնվում է քննարկման փուլում»: Ըստ աղբյուրի, սակայն, նախնական որոշում կա, որ «արտահանձնման հարցումը կմերժվի, քանի որ պարզվել է, որ Միքայել Հարությունյանը 2002թ.-ից ունի ռուսական անձնագիր»: Դիվանագիտական ապտակը մյուս ապտակի հետևից... Ինչպե՞ս է Փաշինյանը դուրս գալու հայ-ռուսական հարաբերություններում այս խառնաշփոթից՝ դժվար է պատկերացնել: Սպասենք իրադարձությունների զարգացմանը: Թամար Բագրատունի