«Արժանապատվությունից ցածր են գտել մասնակցել ձեր էժանագին ներկայացմանը». Զուրաբյանը՝ Հարությունյանին

ՀԱԿ խմբակցության ղեկավար Լևոն Զուրաբյանը ԱԺ-ում հայտարարեց, թե ամեն ինչ որոշված է և ամեն ինչ անում են, որ մերժեն մեր 4+4+4 ֆորմատը: Ըստ նրա՝ խորհրդարանական ուժերի հետ ԸՕ քննարկման ժամանակ իբր ընդունեցին 4+4+4 ֆորմատով առաջարկը, բայց հիմա ամեն ինչ անում են այն վարկաբեկելու համար. «Ո՞վ է ասում, որ այն պետք է լինի միակը, գնացեք բանակցեք «Սյունյաց արծիվների» հետ, «Պանդուխտ» հ/կ-ի հետ: Սա միակը չի, բայց այս ձևաչափից է կախված լինելու իրականում ժողովրդի վստահության բարձրացման խնդիրը»: ԸՕ նախագծի հեղինակ Դավիթ Հարությունյանը դիմելով ԱԺ դահլիճում ներկաներին հետաքրքրվեց, թե ովքեր են ծանոթ, ինչ պլատֆորմի մասին էր խոսում Զուրաբյանը: Երբ արձագանք չստացավ, հայտարարեց. «Ես միշտ մտավախություն եմ ունեցել, որ երբ ասել եք՝ լայն կոնսենսուս, միշտ ուզուրպացրել եք քաղհասարակության կարծիքը, այլ քաղաքական ուժերի կարծիքը: Արտահայտում եք ձեր կարծիքը, բայց խոսում եք լայն հասարակության անունից»: Անդրադառնալով ՀՀ կառավարության աշխատակազմի ղեկավար-նախարար Դավիթ Հարությունյանի խոսքին, ով խնդրեց՝ ձեռք բարձրացնեն այն կազմակերպությունները, որոնք ստորագրել են միասնական պլատֆորմի տակ, բայց ոչ ոք ձեռք չբարձրացրեց, Լ.Զուրաբյանը հայտարարեց, որ ստորագրողներից առնվազն 20 հոգի նստած է դահլիճում, բայց նրանք պարզապես չցանկացան մասնակցել այդ «ներկայացմանը». «Արժանապատվությունից ցածր են գտել մասնակցել ձեր էժանագին ներկայացմանը»: