Լավ չեն անում
«Լավ չեն անում, իսկապես, լավ բան չեն անում, Սասուն Միքայելյանի դերն անուրանալի է եւ պետք է հանձնաժողովի տեղերն առանց քննարկելու հանձնեին նրա տրամադրությանը» այսօր մեզ հետ զրույցում նման կարծիք հայտնեց նախկին ՀԱԿ դաշինքի անդամ, «Քրիստոնեադեմոկրատական ցերածնունդ» կուսակցության ղեկավար Սոս Գիմիշյանը՝ անդրադառնալով Հրազդանում ապրիլի 17-ին տեղի ունենալիք ընտրություններին ու այս համատեքստում ՀԱԿ դիրքորոշմանը։ Հիշեցնենք, որ ՀԱԿ խմբակցության համանուն կուսակցության ներկայացուցիչները անհասկանալի մեկնաբանություններով հրաժարվում են խմբակցության նիստ հրավիրել ու ընտրատեղամասային հանձնաժողովի տեղերը հանձնել «Քաղաքացիական պայմանագիր» կուսակցության տնօրինմանը, որի անդամն է նաեւ Սասուն Միքայելյանը։ Մի քանի շաբաթ առաջ Նիկոլ Փաշինյանը այս հարցում բանակցում էր Արամ Մանուկյանի հետ, սակայն ապարդյուն.«Ամեն դեպքում, արժեր ու պետք էր օգնել Սասուն Միքայելյանին, իսկ թե ինչու են մերժում, անկեղծ ասած զարմացած եմ։ Ընդհանրապես ընդդիմադիր կեցված ունեցող մարդուն արժե օգնել, էլ չենք խոսում, որ ժամանակին բոլորս նույն տեղում ենք եղել, բոլորս ողջ թիմով ենք օժանդակել, եղել ենք հանձնաժողովի կազմում», ասաց Գիմիշյանը չցանկանալով մեկնաբանել Փաշինյանի կուսակիցների այն հայտարարությունները, թե ՀԱԿ-ը հանձնաժողովի այդ տեղերը պահում է ՀՀԿ-ի համար։ Հարցին, քանի որ ՀԱԿ-ի համար ներկայումս եւ ապագայում հենց Նիկոլ Փաշինյանն ու ՔՊ-ն են մրցակից լինելու, միգուցե այդ պատճառով է ՀԱԿ-ը նման պահվածք որդեգրել , Գիմիշյանը պատասխանեց.«Ինչ մրցակից, կաշին կիսելու մրցակի՞ց», նա կրկնեց, որ բոլոր պարագաներում ՀԱԿ-ի քայլն արդարացում չունի։ Նիկոլ Փաշինյանը կրկին անդրադարձել է այդ խնդրին ու ընդգծել, որ զիջելու հարց դրված չէ.«ՀՀ Ընտրական օրենսգիրքը սահմանում է, որ տեղամասային ընտրական հանձնաժողովներում նշանակումներ կատարում են կամ խմբակցություն ձեւավորած կուսակցությունները կամ, եթե խմբակցությունները ձեւավորվել են դաշինքներով՝ նշանակումները կատարում են խմբակցությունները: Հիմա, Սասուն Միքայելյանը ՀԱԿ նախընտրական ցուցակի 13-րդ հորիզոնականում է գտնվել: Սասուն Միքայելյանի դերն անուրանալի է ՀԱԿ խմբակցության ձեւավորման գործում: Կարծում եմ՝ սրանք փաստեր են, որոնք վիճարկման ենթակա չեն»,- ԱԺ-ում լրագրողների հետ զրույցում ասել է Նիկոլ Փաշինյանը՝ հավելելով, որ ՀԱԿ խմբակցության 7 անդամներից 4-ը կողմ են արտահայտվել, որպեսզի Սասուն Միքայելյանն առաջարկի հանձնաժողովի անդամներին: Ն. Փաշինյանը վերջակետ է դրել այն թյուրըմբռնմանը, թե հանձնաժողվի տեղերից պետք է մարդկանց հանեն եւ Սասուն Միքայելյանի ներկայացրած թեկնածուներին նշանակեն: «Ուզում եմ մենք ճիշտ հասկանանք: Այդ հանձնաժողովները ձեւավորված չեն, գոյություն չունեն, այդտեղ այս պահին մարդ նշանակված չէ, որ մենք նրանց հանենք ուրիշ մարդ նշանակենք: Այդ հանձնաժողովների ձեւավորման պրոցեսն սկսվել է այս շաբաթ եւ շարունակվելու է այս շաբաթ, եւ հանձնաժողովների թեկնածուների առաջադրումը, որ խմբակցությունը կամ կուսակցությունները պետք է մարդկանց ցուցակներ ներկայացնեն, թե որտեղ ում են պատկերացնում, սկսվելու է վաղը չէ մյուս օրը՝ ամսի 18-ին»,- պարզաբանել է Նիկոլ Փաշինյանը: Անի Սահակյան