ՀՀԿ-ն համ նալին, համ մեխին. որն է լինելու Քոչարյանի ընտրությունը
Օգոստոսի 17-ի հանրահավաքին` Նիկոլ Փաշինյանի կոշտ ելույթից հետո, ԱԺ ՀՀԿ-ական նախագահ Արա Բաբլոյանը հայտարարեց հարցերը երկխոսությամբ լուծելու նպատակով հանդիպումների շարք նախաձեռնելու մասին, որից հետո օգոստոսի 27-ին տեղի ունեցավ հանդիպում վարչապետ Նիկոլ Փաշինյանի հետ: Հանդիպումից հետո տարածվեց համատեղ հայտարարություն, որտեղ կետերից առանցքայիններից մեկը արտահերթ խորհրդարանի ընտրության մասին հիշատակումն էր: Վարչապետն ու ԱԺ նախագահը արձանագրում էին կառավարության ծրագրով նախատեսված մեկամյա ժամկետում, այսինքն՝ ամենաուշը մինչև 2019 թվականի մայիս արտահերթ ընտրություն անցկացնելու օրակարգի վերահաստատում: Միայն թե ի տարբերություն Նիկոլ Փաշինյանի առաջարկի, սահմանադրական փոփոխությունները պետք է կատարվեն ոչ թե Ազգային ժողովի, այլ հանրաքվեի միջոցով: Բանն այն է, որ գործող Սահմանադրությունը ԱԺ-ն լուծարելու եւ արտահերթ ընտրությունների գնալու մեկ ճանապարհ է մատնանշում, վարչապետը պետք է հրաժարական տա, դրանից հետո ԱԺ-ն երկու անգամ վարչապետի ընտրությունը տապալի: Իսկ Փաշինյանը կասկածներ ունի, որ ՀՀԿ-ն հակահեղափոխության գործընթաց է սկսել եւ իր հրաժարականից հետո այլ թեկնածու կառաջադրի: Ուստի ցանկանում է սահմանադրական փոփոխությունների միջոցով գտնել այլ մեխանիզմ ԱԺ-ն ինքնալուծարելու: Բաբլոյանի ու Փաշինյանի հանդիպման ժամանակ ըստ էության կողմերը եկել են համաձայնության ԱԺ-ի ինքնալուծարման ճանապարհով հասնել արտահերթ ընտրությունների: Եւ ահա, ԱԺ խոսնակի այդ հայտարարությունից հետո մեկը մյուսի հետեւից նրան հերքում են կուսակիցները: Երեկ Էդուարդ Շարմազանովն էր հակադարձում Բաբլոյանին, թե սահմանադրական փոփոխությունների անհրաժեշտություն չկա, այլ հարց է, որ Փաշինյանը ցանկանում է իր համար Սահմանադրություն ձեւել, իսկ այսօր ՀՀԿ խմբակցության ղեկավար Վահրամ Բաղդասարյանն է պնդում, որ ԱԺ-ն ինքնալուծարելու անհրաժեշտություն չկա: Վահրամ Բաղդասարյանը լրագրողների հետ զրույցում անդրադառնալով արտահերթ խորհրդարանի ընտրության խնդրին՝ ասել է, թե չի կարծում, որ ավելի քաղաքական ԱԺ լինի, քան ներկայիս խորհրդարանն է: «Համենայնդեպս, մենք կարողանում ենք այս Ազգային ժողովի բնականոն աշխատանքն ապահովել, և ես չեմ կարծում, որ հաջորդ Ազգային ժողովն ավելի քաղաքական կլինի, քան այս Ազգային ժողովն է»,- հայտարարել է Վահրամ Բաղդասարյանը: Ստացվում է, որ ՀՀԿ-ականները հանդես են գալիս կուսակցական խոսնակի դեմ, ով կամ սեփական խաղն է առաջ տարել՝ իր պաշտոնը մինչեւ արտահերթ ընտրություն պահելու դիմաց գործարք կնքելով Նիկոլ Փաշինյանի հետ, կամ կատարել է կուսակցության հրահանգը եւ ապահովել ՀՀԿ-ում բազմակարծություն, ավելի ճիշտ տարակարծություն, քանի որ այդպես է պահանջում քաղաքական իրավիճակը: Մի կողմից՝ պետք է Նիկոլ Փաշինյանի հետ համագործակցությունը պահել, մյուս կողմից շարժվել Քոչարյանի խաղի կանոններով, ի վերջո, առաջին հերթին երկրորդ նախագահն էր, որ չբացեց խաղաքարտերը ու չհայտնեց ՀՀԿ-ի հետ իր պլանների մասին, ավելին չբացառեց սեփական կուսակցություն հիմնելու հավանականությունը: Անի Սահակյան
Հետևեք մեզ Viber-ում
