Նոր կառավարության համար ադապտացիոն շրջանը համարվում է ավարտված. վարչապետ
Կառավարության այսօրվա նիստում վարչապետ Նիկոլ Փաշինյանը հայտարարեց, որ նոր կառավարության համար ադապտացիոն շրջանը համարվում է ավարտված, և արդեն շատ լրջորեն պետք է զբաղվել բարեփոխումների լայնածավալ գործողություններով, և, որ այդ բարեփոխումներն իրենց հերթին տնտեսական և քաղաքական զարգացման նոր շունչ, լիցք և ալիք կբերեն Հայաստան: «Ես կարծում եմ, որ մենք պետք է արձանագրենք բարեփոխումների մեր մեթոդաբանությունը՝ հաշվի առնելով Հայաստանում առկա քաղաքական իրողությունները: Ընդհանրապես ընդունված է ասել, որ բարեփոխումներն, այսպես ասած, ցավոտ գործընթաց են: Բայց ես կածում եմ, որ այս տրամաբանությունից պետք է հրաժարվենք, որովհետև բարեփոխումների մեր ալգորիթմը պետք է լինի ընդարձակ երկխոսությունը հանրության հետ, համաձայնության հաստատումը այս կամ այն բարեփոխումների ուղղությամբ»,- հայտարարեց Նիկոլ Փաշինյանը: Նա նշեց, որ առաջին քայլն այն կլինի, որ արդեն հաջորդ շաբաթվանից Հարկային օրենսգրքի փոփոխությունների վերաբերյալ երկխոսություն կսկսեն հանրության հետ: «Ես բոլորիս մաղթում եմ պրոֆեսիոնալիզմ, իմաստություն, խելամտություն և հաջողություն»,- ասաց նա:
Հետևեք մեզ Viber-ում
