Ում խոսքին է սպասում Քոչարյանը
ՀՀԿ-ն պատրաստ է համագործակցել բոլոր քաղաքական ուժերի, այդ թվում` ՀՀ երկրորդ նախագահ Ռոբերտ Քոչարյանի հետ: Ազգային ժողովում լրագրողների հետ ճեպազրույցում այս մասին ասաց ԱԺ փոխնախագահ, ՀՀԿ խոսնակ Էդուարդ Շարմազանովը: «ՀՀԿ-ն կոնսոլիդացված քաղաքական ուժ է: Մենք պատրաստ են համագործակցել բոլոր քաղաքական ուժերի, այդ թվում՝ Ռոբերտ Քոչարյանի հետ։ Ռոբերտ Քոչարյան պետական քաղաքական գործիչը լուրջ ասելիք ու անելիք ունի Հայաստանի քաղաքական դաշտում: Սա իմ մասնավոր կարծիքն է»,-ասաց Շարմազանովը: Նրա կարծիքով` Քոչարյանը կզբաղվի քաղաքականությամբ, ավելին՝ նա արդեն իսկ զբաղվում է: ՀՀԿ խոսնակի հայտարարությանը հաջորդեց ոչ պակաս ուշագրավ մի հայտարարություն, ավելի ճիշտ մեկնաբանություն Քոչարյանի գրասենյակի ղեկավար Վիկտոր Սողոմոնյանի կողմից։ Բանն այն է, որ մամուլում վերջին շրջանում տեղեկություններ կան այն մասին, որ Քոչարյանը կուսակցություն է ստեղծում, Սողոմոնյանը մեկնաբանելով այս լուրը՝ ըստ էության չհերքեց․«Ռոբերտ Քոչարյանի վերադարձը կարող է տարբեր ձևաչափերով լինել, այդ թվում՝ նաև կուսակցություն ստեղծելու, ժամանակ տվեք, իր հետ կխոսեմ, և ամեն ինչ պարզ կլինի», ասել է Սողոմոնյանը։ ՀՅԴ խմբակցության ղեկավար Արմեն Ռուստամյանն էլ կտրականապես չմերժեց Քոչարյանի հետ հանարավոր համագործակցությունն ասելով, որ պատրաստ են համագործակցել բոլոր այն անձանց եւ կուսակցությունների հետ, ում համար իրենց ծրագիրն ընդունելի կլինի։ Մինչդեռ Ծառուկյան խմբակցության պատգամավորներն Քոչարյանի մասին հարցերից այսօր ԱԺ-ում այս ու այն կողմ էին փախչում եւ ձեւացնում, թե զբաղված են, կամ ցրում՝ ասելով, որ Քոչարյանը դեռ չի վերադարձել քաղաքականություն։ Ստացվում է, որ Քոչարյանի երբեմնի քաղաքական հենարան առնվազն երկու կուսակցությունները կրկին հանդես են գալիս նրան աջակցությամբ, այնինչ այդ հայտարարություններից շատ չանցած հետեւում է Սողոմոնյանի հայտարարությունը, ինչը ՀՀԿ-ական շրջանակներում քննարկման առիթ էր դարձել։ Նրանք զարմացած են, որ Ռոբերտ Քոչարյանը ցայսօր որևէ կերպ չի արձագանքել նաեւ իրեն ազատելու երեշխավորությամբ հանդես եկած ՀՀԿ դիրքորոշման առիթով։ Հիշեցնենք, որ ավելի քան 40 պատգամավոր էր ստորագրել ազատության երաշխավորագրի տակ։ Արդյոք Քոչարյանը դեռեւս ծանրութեթեւ է անում ՀՀԿ-ի հետ համագործակցելու նպատակահարմարությունը՝ հասկանալով, որ թավշյա հեղափոխությունից հետո այդ կուսակցության շանսերը գրեթե զրոյական են, նույնը կարելի է ասել ՀՅԴ-ի մասին։ Մենք նաեւ գրել էինք, որ Սերժ Սարգսյանի եւ Քոչարյանի համագործակցությունը միջնորդավորված է եւ նրանցից որեւէ մեկը հանդիպելու նախաձեռնողականություն չի դրսեւորում։ Ամենայն հավականանությամբ Քոչարյանը դեռեւս կսպասի Ծառուկյանի արձագանքին, որը Քաղաքացիական պայմանագիր կուսակցությունից հետո միակ ուժն է, որը մշտական բարեգործության շնորհիվ պահպանել է վարկանիշը։ Հավանաբար դրանից հետո Քոչարյանը կկատարի իր ընտրությունը եւ կորոշի՝ ստեղծել սեփական թիմը, թե հենվել ՀՀԿ-ի ու ՀՅԴ-ի աջակցության վրա։ Անի Սահակյան
Հետևեք մեզ Viber-ում
