Վահրամ Բաղդասարյանի պատասխանը Քոչարյանին

ԱԺ ՀՀԿ խմբակցության ղեկավար Վահրամ Բաղդասարյանն այսօր անդրադարձել է նաև ՀՀ երկրորդ նախագահ Ռոբերտ Քոչարյանի հայտարարությունը, թե հեղափոխության պատճառներից մեկը Սերժ Սարգսյանի կողմից երրորդ ժամկետի գնալն էր եւ վարչապետի պաշտոնում առաջադրվելը: Ինչպես նշել է՝ այս գործընթացը բավական երկար ժամանակ նախապատրաստվում էր եւ անկախ նրանից ով կլիներ ընտրված վարչապետը, ինչ-որ գործողություններ եւ գործընթաց պետք է գնար, որովհետեւ դա տվյալ քաղաքական ուժի կամ ուժերի, կամ թիմի որոշումն է եղել՝ իշխանության գալ: «Ինձ թվում է, որ ցանկացած պարագայում, անխուսափելի էր լինելու շարժումը, որը նրանք պետք է անեին: Սա իմ անձնական կարծիքն է»,-ասաց նա: Ինչ վերաբերում է Քոչարյանի այն պնդմանը, որ եթե սահմանադրական փոփոխություն չլիներ, երրորդ ժամկետի խնդիր էլ չէր լինի և հեղափոխություն տեղի չէր ունենա, Բաղդասարյանը նկատեց, որ խորհրդարանական պետության խնդիրը քննարկվում էր դեռ շատ վաղուց, որը ժամանակին իշխանությունը վաղաժամ էր համարում, իսկ այս փուլում պահը հասունացել էր: