«Այդ ռիսկը թույլ չի տալիս գնալ բացարձակ աշխատանքների». Արթուր Գրիգորյան
Տնտեսության զարգացման առումով շատ կարևոր է հանքարդյունաբերության ոլորտը: Այս մասին այսօր մամուլի ասուլիսին ասաց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը:
Նա նշեց, որ իր պաշտոնի ստանձնումից հետո առաջնահերթ խնդիր է համարել ծրագրերն ուսումնասիրելը և հանձնարարել է շատ արագ կատարել ծրագրերի գույքագրում:
«Ես առաջնահերթ դրել էի ատոմակայանը ժամանակին վերագործարկելու հարցը: Իմ կողմից ձեռնարկվել են հնարավոր բոլոր միջոցները, գնացել ենք ոչ ստանդարտ լուծումների և կարողացել ենք ճիշտ ժամանակին՝ օգոստոսի 1-ին վերագործարկել ատոմակայանը»,-ասաց նա:
Արթուր Գրիգորյանը հայտնեց, որ այս տարի էլեկտրաէներգիայի աննախադեպ սպառում է եղել, երբևէ ամռանը այդքան սպառում չի գրանցվել. ամռան երեք ամիսներին օրական ծախսվել է գրեթե 1030 մեգավատ էլէներգիա:
«Նման ծախս ունեցել ենք հիմնականում Նոր տարվա օրերին, բայց ամռան ամիսներին նման իրավիճակ չէր եղել և դա պայմանավորված էր հիմնականում շոգ օրերի հետ»,-ասաց նա:
Արթուր Գրիգորյանը նշեց, որ այսօր ունենք քսանյոթ մետաղական հանքավայրերի շահագործման համար տրված լիցենզիաներ, և ուսումնասիրությունների արդյունքում տասը հանքավայրերին արդեն տրված են զգուշացումներ, քանի որ ուսումնասիրությունը ցույց տվեց, որ շահագործումն իրականացվում է օրենքով սահմանված չափանիշներից դուրս: Նա նաև նշեց, որ ոչ մետաղական 146 հանքավայրերին տրվել են զգուշացումներ:
«Դուք գիտեք, որ ՀՀ վարչապետի դիրքորոշումն այդ առումով բավական խիստ է, և հանքարդյունաբերության ոլորտը պետք է բերվի իրավական դաշտ»,- ասաց նա:
Անդրադառնալով Թեղուտի խնդրին՝ նախարարն ասաց, որ Թեղուտի վերաբերյալ Կառավարությունն առանձնահատուկ մոտեցում է ցուցաբերում, և խնդիրը հիմնականում պոչամբարի պատվարի շինարարական ռիսկերի հետ է կապված, որի պատճառն այն է, որ ժամանակին ճիշտ տեխնիկական եզրակացություն չի եղել:
«Այդ ռիսկը թույլ չի տալիս գնալ բացարձակ աշխատանքների, և որպեսզի ճիշտ գնահատվի իրավիճակը, ժամանակավոր դադարեցվել է շահագործումը: Դա ցավալի իրավիճակ է, քանի որ ութ հարյուր աշխատակից անգործ է մնացել, մենք մտահոգ ենք այդ առումով և հնարավորինս արագ փորձելու ենք տալ լուծումներ՝ հաշվի առնելով նաև ռիսկերը, բայց մեզ համար առաջնահերթ է մնում հանքավայրի շահագործման անվտանգության խնդիրը»,- ասաց նա:
Անդրադառնալով «Լիդիան Արմենիա» ընկերության աշխատանքներին՝ Արթուր Գրիգորյանն ասաց, որ բնապահպանության և ընդերքի տեսչության կողմից կատարվում են ուսումնասիրություններ:
«Այս իրավիճակը ցավոտ ենք գնահատում, քանի որ լուրջ ներդրումներ է ներկայացրել ընկերությունը և պատրաստում է ներկայացնելու, բայց չենք կարող հաշվի չառնել այն բնապահպանական խնդիրները, որոնք բարձրաձայնվում են: Մենք պետք է ամեն ինչ անենք, որ չխաթարենք ներդրողի կողմից կատարված աշխատանքը և առհասարակ Հայաստան եկող ներդրումները, պետք է շատ զգուշավոր լինենք և չպետք է մոռանանք նաև բնապահպանական խնդիրները»,- ասաց նա և նշեց, որ տեսչությունը հայտարարել է իր եզրակացությունը, որ մեկ–երկու խնդիր է hայտնաբերել, որի վերաբերյալ պատրաստում է ՇՄԱԿ ուսումնասիրություն կատարել:
Հետևեք մեզ Viber-ում
