Չենք կիսում Ռոբերտ Քոչարյանի դիրքորոշումը. Էդուարդ Շարմազանով
Ռոբերտ Քոչարյանի գնահատականները սահմանադրական բարեփոխումների վերաբերյալ մեզ համար նորություն չեն: Այս մասին, օգոստոսի 29-ին, ԱԺ-ում լրագրողների հետ զրույցում նշեց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը՝ անդրադառնալով փաստին, որ նախօրեին ՀՀ երկրորդ նախագահ Ռոբերտ Քոչարյանը քննադատել էր Սերժ Սարգսյանի կողմից սահմանադրական փոփոխությունների նախաձեռնելը և երրորդ ժամկետ գնալը: «Այդ ընթացքում եղել են քաղաքական գործիչներ, պաշտոնաթող նախագահներ, քաղաքական կուսակցություններ, որոնք դեմ են արտահայտվել սահմանադրական բարեփոխումներին, եղել են գործիչներ, որ կողմ են արտահայտվել, եղել է հրապարակային քարոզչություն՝ կողմ և դեմ: Ես կարող եմ վերահաստատել իմ և ՀՀԿ-ի կարծիքը, որ սահմանադրական բարեփոխումները եւ խորհրդարանական կառավարման անցնելու անհրաժեշտությունը կար, գտնում եմ, որ դա շատ դրական քայլ էր Հայաստանի ժողովրդավարության, ինչու չէ, նաեւ ազգային անվտանգության ուղղությամբ: Կարծում եմ՝ ժամանակը դեռ ցույց կտա, որ խորհրդարանական համակարգին ամբողջական անցումը բխում էր պետության անվտանգության եւ պետականության շահի գերակայությունից: Ժամանակ է պետք, որ դրանում եւս մեկ անգամ համոզվենք: Ես այն կարծիքին չեմ, որ Սահմանադրությունը փոխվել է, որպեսզի Սերժ Սարգսյանը երրորդ ժամկետով պաշտոնավարի: Սահմանադրությունը փոխվել է շատ ավելի կարեւոր հիմնավորումներով, որի մասին խոսել ենք: Սերժ Սարգսյանի առաջադրման պահով էլի եղել են տարբեր կարծիքներ: Ես գտնում եմ, որ ապրիլի 18-ի դրությամբ Սերժ Սարգսյանի այստեղ ընտրվելը բխում էր ՀՀ պետական շահից, քանի որ այն ժամանակվա իրականությամբ ՀՀԿ-ն ընտրություններում ստացել էր քաղաքական մեծամասնություն եւ ըստ պառլամենտական համակարգի, մենք պետք է որոշեինք, թե ում ենք վստահում վարչապետի պաշտոնը: Ուստի հարգանքով վերաբերվելով երկրորդ նախագահի կարծիքին, բնականաբար, չենք կիսում իր դիրքորոշումը: Սա չի նշանակում, որ շատ ու շատ այլ հարցերի վերաբերյալ մենք չենք կարող համագործակցել»,- ասաց նա:
Հետևեք մեզ Viber-ում
