Վանաձորում թալանել են տեղի 4-րդ երաժշտական դպրոցի ուսուցչուհու տունը. վնասը կազմում է մոտ 1,5 մլն դրամ

SHAMSHYAN.com-ի տեղեկություններով, Հայաստանի քննչական կոմիտեի Լոռու մարզային քննչական վարչության հատկապես գործերով քննիչ Մուրադյանի կողմից նյութեր են նախապատրաստվում այսօր՝ օգոստոսի 26-ին, Լոռու մարզում տեղի ունեցած խոշոր չափի գողության փաստով: Ինչպես հայտնում է ֆոտոլրագրող Գագիկ Շամշյանը, այսօր Վանաձոր քաղաքի ոստիկանության Բազումի բաժին է դիմել Վանաձոր քաղաքի Երևանյան խճուղու 129 շենքի բնակչուհի, 23-ամյա Անժելա Տոնոյանը և հայտնել, որ օգոստոսի 25-ի ժամը 13:00-ից մինչև այսօր գիշերը ժամը 02:00-ն ընկած ժամանակահատվածում անհայտ անձը կամ անձինք տեխնիկական միջոցների գործադրմամբ տան մուտքի դուռը բացելու միջոցով ներս են մտել բնակարան, և այնտեղից հափշտակել խոշոր չափի գումար, ինչպես նաև ոսկյա ու արծաթյա զարդեր: Գ. Շամշյանի տեղեկություններով, գողը կամ գողերը նշված բնակարանից տարել են 7000 ՌԴ ռուբլի, 200 հազ. դրամ, 300 ԱՄՆ դոլար, ինչպես նաև 1 մլն դրամ ընդհանուր արժողությամբ ոսկյա և արծաթյա զարդեր: Ֆոտոլրագրողի տեղեկություններով, գողոնը պատկանում է Վանաձորի թիվ 4 երաժշտական դպրոցի ուսուցչուհի, 55-ամյա Սրբուհի Առաքելյանին: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: