ՊԵԿ նախագահը՝ԱԱՀ-ի բարձրացման մասին (video)
Կառավարությունում լրագրողների հետ զրույցում ՊԵԿ նախագահ Դավիթ Անանյանը հայտարարեց,որ ավելացված արժեքի հարկի տոկոսադրույքի բարձրացում չի նախատեսվում, իսկ Կառավարությունը բիզնեսին աջակցող փաթեթով սեպտեմբերին գնալու է Ազգային ժողով: Հարցին, թե ավելացված արժեքի հարկի տոկոսադրույքի բարձրացում նախատեսվո՞ւմ է՝ բյուջեում որոշակի ճեղքվածքներ փակելու համար, Դավիթ Անանյանն ասաց. «Ո՛չ, այս պահին նման հարց չի քննարկվում»: Ստվերային տնտեսության մասին էլ , Դավիթ Անանյանն ասաց, որ ստվերային տնտեսության գնահատական է տրվում ՊԵԿ-ի ներքին ռեսուրսներով, աշխատանքային խումբ է ձևավորվել, և առաջին անգամ ոլորտային ստվեր են գնահատում: Հարցին, թե կարող է թիվ նշել, թե ի վերջո ՀՀ տնտեսության քանի տոկոսն է ստվերում, Դավիթ Անանյանն ասաց. «Իհարկե, ոչ: Դա այնպես չէ, որ մեկ կամ երկու ամսում հնարավոր է գնահատել, աշխատանքային խումբն աշխատում է, քննարկում է մեթոդաբանությունը, նախնական տեղեկատվություն չեմ կարող տալ: Մենք ստվերի գնահատական պետք է տանք գործունեության 20 խմբավորումներով»: Ինչ վերաբերում է Կառավարության նոր նախագծի փաթեթին, Դավիթ Անանյանն ասաց, որ սեպտեմբերին կունենան Կառավարության քննարկած փաթեթը, որը կներկայացնեն Ազգային ժողով:
Հետևեք մեզ Viber-ում
