Փոքր բիզնեսի համար համարյա կլինի հարկի բացակայություն՝ Նիկոլ Փաշինյան

Հայաստանի Հանրապետության վարչապետ Նիկոլ Փաշինյանը Հարկային մարմիններին հանձնարարել է, որ միկրոբիզնեսի և արտադրության նկատմամբ իրականացվի մեղմ վարչարարություն: Ֆեսյբուքի իր էջում ուղիղ եթերի ընթացքում հայտարարել է ՀՀ վարչապետ Նիկոլ Փաշինյանը: Նիկոլ Փաշինյանն ընդգծեց, որ միկրոբիզնեսի և արտադրանք թողարկող ընկերությունների նկատմամբ պետք է լինի մեղմ վարչարարություն: «Սա իմ մոտեցումն է: Ուզում եմ ասել, որ Հարկային օրենսգրքում կլինի մի կարևոր փոփոխություն, որն աջակցություն է փոքր բիզնեսին: Մենք փոքր բիզնեսի համար, որը տարեկան մինչև 24 միլիոն դրամի շրջանառություն ունի, կսահմանենք, ըստ էության, սիմվոլիկ հարկ: Փաստացի դա համարյա կլինի հարկի բացակայություն: Խոսքը շրջանառության հարկի մասին է: Այսինքն, միկրոբիզնեսը կլինի հարկային առումով արտոնյալ պայմաններում»,- «Արմենպրես»-ի փոխանցմամբ՝ ասել է Փաշինյանը: Վարչապետը ներկայացրեց նաև, թե ինչ գաղափարներ են քննարկվում կառավարությունում: «սրանք նախագաղափարներ են, ես խնդրում եմ սրանք չշփոթել արդեն կայացված որոշումների հետ: Կա այսպիսի գաղափար: Օրինակ՝ եթե մեկն ունի 100 հազար դոլար կամ 50 հազար դոլար, ինքը կարող է մտածել ինչ-որ բիզնես ստեղծելու մասին, բայց եթե մեկն ունի 3 հազար դոլար կամ 5 հազար դոլար և ցանկանում է այդ փողը ինչ-որ տեղ ներդնել, ինքն այսօրվա դրությամբ այդպիսի հնարավորություն չունի: Մնում է միայն բանկային ավանդի տարբերակը, սակայն դա պասիվ գործունեություն է: Մենք կարծում ենք, որ քաղաքացիներն ավելի ակտիվ ներդրումներ անելու հնարավորություն պետք է ունենան և այս առումով կարևորում ենք ֆինանսական շուկայի այնպիսի ընկերությունների գոյությունը, որոնք արժեթղթեր են թողարկում, որտեղ քաղաքացիները կարող են արժեթղթեր գնել՝ այդպիսով մասնակցելով բիզնեսին փոքր ներդրումներով»,- մանրամասնել է Փաշինյանը: Հաջորդ գաղափարը ներդրումների հայկական հիմնադրամի ստեղծման մասին է, որտեղ էլի կոմերցիոն, բայց շատ մատչելի տոկոսներով փորձ արվի վարկավորել բիզնեսը: Սրանք գաղափարներ են, որոնք քննարկվում են, որոնց հետ կապված կան խնդիրներ և բարդություններ, սակայն ուղղություններ են, որոնց մասին մենք մտածում ենք»,- ընդգծել է վարչապետը: