Նախկինները պետք է հասկանան, որ անցած էջն այլեւս փակված է. մենք Փաշինյանի կառավարության կողքին ենք. Սեֆիլյան

Այսօր Ժիրայր Սեֆիլյանն ու Վարուժան Ավետիսյանը հայտարարեցին նոր կուսակցություն ստեղծելու մասինև տեղեկացրեցին, որ առաջիկա ԱԺ ընտրություններին են մասնակցելու: Ժիրայր Սեֆիլյանն ասաց, որ ներկայումս խառնակ վիճակ է տիրում, նախկինները նորից փորձում են գլուխ բարձրացնել. «Խառնակչությունների հնարավորություն կա, բայց սա թող չդիտվի նախկինների հաջողության հնարավորություն: Դա բացառվում  է, այդ էջը փակված է, նախկինները նույնպես պետք է  հասկանան, որ այդ էջն այլեւս վերջացած պատմություն է: Մենք բոլորս հասկանում ենք, որ նրանք այժմ ակտիվացել են ոչ իրենց ցանկությամբ, աշխարհաքաղաքական ուժեր են նրանց բզբզում, ինչպես կասեր Սերժ Սարգսյանը: Այդ աշխարհաքաղաքական ուժը պիտի հասկանա, որ եկել են նոր ժամանակներ: Մենք հասկանում ենք, որ պետք է դիմակայենք այդ խառնակչություններին եւ ինչքան շուտ պարոն Փաշինյանը դիմի վիրաբուժական մոտեցումների, այնքան ավելի լավ»: Սեֆիլյանը նշեց, որնրանք ակտիվացել են բոլորովին ոչ իրենց ցանկությամբ, բոլորին պարզ է, թե աշխարհաքաղաքական որ ուժն է բզբզում նրանց: «Ինչպես այդ նույնն ուժերի կողմից փորձ կատարվեց հեղափոխության օրերին Սերժին փոխարինելու Կարեն Կարապետյանով, բոլորս տեսանք ինչպես ձախողվեց՝ շնորհիվ Նիկոլ Փաշինյանի հմուտ գործունեության, Կարեն Կարապետյանը մի օրվա մեջ դարձավ Սերժ Սարգսյան, հիշում եք լոզունգը՝ մերժիր Սերժի Կարենին: Այդ աշխարհաքաղաքական ուժը պիտի հասկանա նաեւ, որ եկել են նոր ժամանակներ, եկել է Հայաստանի հայության հետ արժանապատիվ հարաբերություններ հաստատելու ժամանակները, դա որոշողը ես չեմ, պարոն Փաշինյանը չի, դա նոր ժամանակների հրամայականն է»,- ասաց Սեֆիլյանը: Ժիրայր Սեֆիլյանը ընդգծեց, որ իենց նորաստեղծ «Սասնա ծռեր» կուսակցությունը կանգնած է Նիկոլ Փաշինյանի կառավարության կողքին եւ բոլորը պետք է հասկանան, որ փաշինյանենց ձախողումը կլինի բոլորի ձախողումը: