Ի՞նչ «զենք» է տալիս ՀՀԿ-ն Նիկոլին
Հանրապետական կուսակցությունում չեն բացառում համագործակցությունը Ռոբերտ Քոչարյանի հետ` երեկ «Ազատության» հետ զրույցում այսպիսի հայտարարություն է արել Ազգային ժողովի հանրապետական փոխնախագահ Էդուարդ Շարմազանովը: Նա միաժամանակ, ընդգծել է, որ ներկայացում է իր տեսակետը, և Քոչարյանի հետ համագործակցության հարցը ՀՀԿ-ում չեն քննարկել: «Աշխարհաքաղաքական և արժեքային համակարգի առումով, այո՛, մենք կարող ենք նաև համագործակցել երկրորդ նախագահի հետ և ոչ միայն երկրորդ նախագահի հետ․ տարբեր քաղաքական ուժերի հետ։ Բայց դա ոչ թե լինելու է ընդդեմ հեղափոխության, ինչպես ցանկանում են դա ներկայացնել, այլ դա պետք է լինի հանուն Հայաստանի Հանրապետության, Արցախի Հանրապետության անվտանգության: Բայց սա իմ մասնավոր տեսակետն է: Մենք պաշտոնապես քննարկում չենք արել: Ես տեսականորեն՝ իմ կարծիքը արտահայտեցի»: Դիտարկմանը, թե՝ ՀՀԿ իշխանության տարիներին Ռոբերտ Քոչարյանը բավականին սուր քննադատում էր Հանրապետականին, Շարմազանովը հակադարձել է՝ եղել են նաև ՀՀԿ-Քոչարյան արդյունավետ համագործակցության տարիներ: «Ես կարող եմ ասել, որ Սերժ Սարգսյանը այն պետական գործիչն է, որը հանուն Հայաստանի Հանրապետության, հանուն Արցախի անվտանգության, հանուն կարևորագույն հարցերի, պատրաստ է իր կուսակցության հետ քննարկել համագործակցությունը բոլոր այն առողջ ուժերի հետ, որոնք պատրաստ են դիմակայել այդ մարտահրավերներին, որոնց վտանգն այսօր կա», - շարունակեց ՀՀԿ խոսնակը: - «Իսկ այն, որ այդ առողջ ուժերի մեջ, ըստ իս, մտնում է, և կարծեմ՝ նախևառաջ, Ռոբերտ Քոչարյանը, երկու կարծիք լինել չի կարող»: Հարցին՝ ՀՀԿ-ն բանակցություններ վարո՞ւմ է Ռոբերտ Քոչարյանի հետ, Շարմազանովը պատասխանել է․ «Ոչ, բանակցությունների մասին խոսք չի եղել, մենք դեռևս գործադիր մարմնի նիստ չենք արել: Մենք մեր կարծիքն ենք արտահայտել Քոչարյանի խափանման միջոցի հետ կապված: Մնացածը՝ մենք ունենք մեր մոտեցումները․․․ Մենք ամենամեծ խմբակցությունը ունեցող քաղաքական ուժն ենք: Երեկվա՝ երկրորդ նախագահի հարցազրույցից ես նման տպավորություն ստացա, որ շատ հարցերում՝ նախևառաջ աշխարհաքաղաքական և անվտանգության հիմնահարցեր, ինչպես նաև իրավական տեռորի և քաղաքական տեռորի հետ կապված, խոսքի ազատությունը սպանելու քայլերի հետ կապված, որը արվում է Հայաստանի Հանրապետությունում, մենք ունենք շատ ու շատ մոտ կարծիքներ»: Այսպես, ՀՀԿ-ն, որը Սերժ Սարգսյանի իշխանության տարիներին ժամանակ առ ժամանակ անգամ սուր և վիրավորանքներ է հասցրել Քոչարյանի հասցեին, այսօր «ընդհանուր թշնամի» համարելով Փաշինյանի իշխանությանը՝ չի բացառում Քոչարյանի հետ համագործակցություն: ՀՀԿ-ն որպես իշխանություն կորցրած ուժ իրավունք ունի ապացուցել, որ քաղաքական-գաղափարական կուսակցություն է, ոչ թե լավ օրերի համար փողատերերի հավաքատեղի: Այժմ Սերժ Սարգսյանը «ընդհատակում է», սպասում է Փաշինյանի հեղափոխության փողոցային էյֆորիայի անկմանը, որից հետո նրա դեմ պայքարի հնարավոր սցենարները գործարկելու հնարավորությանը: Եթե ՀՀԿ-ն ցանկանում է մասնակցել հաջորդ խորհրդարանական ընտրություններին՝ նրան հարկավոր է դեմք, որը քիչ թե շատ ՀՀԿ-ի վարկաբեկումը կարող է մեղմացնել: ՀՀԿ-ն հայտնվել է ՀՀՇ-ի իշխանության կորստի վաղ շրջանին, երբ ցանկացած ՀՀՇ-ական բացասական տրամադրություններ էր առաջացնում: Արդյոք ՀՀԿ-ի դեմքը փրկելու համար հարմար տարբերակ կարող է լինել Ռոբերտ Քոչարյանը: Միանշանակ՝ ո՛չ, որովհետև այս սցենարը կլինի Փաշինյանի համար հրաշալի նվեր, թեկուզ այն պատճառով, որ Քոչարյանի վրա Մարտի 1-ի արյան մեղք կա, իսկ դա երբեք չի մաքրվելու հասարակության գիտակցությունից: Փաշինյանը «քարը քարին» չի թողնի ու կջախջախի ՀՀԿ-Քոչարյան համագործակցությունը՝ թեկուզ ժամանակ առ ժամանակ Մարտի 1-ի գործով թե՛ Ռոբերտ Քոչարյանին, թե՛ Սերժ Սարգսյանին պահելով լարվածության մեջ, էլ չենք ասում՝ նրանց իշխանավարման տարիներին ապօրինի հարստացման, կոռուպցիայի ու թալանի գործերի դոզավորված բացահայտումները հրապարակ բերելու հնարավորությունները: Այնպես որ, ՀՀԿ-ի՝ Քոչարյանով հնարավոր ռեաբիլիտացիան ի սկզբանե տապալված սցենար է: ՀՀԿ-ն Քոչարյանով ասպարեզ գալու դեպքում ցույց կտա իր անճար ու խղճուկ վիճակն այն առումով, որ գոնե մեկ քիչ թե շատ չվարկաբեկված դեմքի վրա խաղադրույք դնելու ու քաղաքական ընտրապայքար տանելու հնարավորություն էլ չի թողել: Մետաքսյա Շալունց
Հետևեք մեզ Viber-ում
