Բարաք Օբաման մտադիր է վետո դնել
ԱՄՆ նախագահ Բարաք Օբաման մտադիր է վետո դնել հանրապետական ընդդիմության օրինագծի վրա, որը կարող է խանգարել Իրանի միջուկային ծրագրի վերաբերյալ համաձայնագրի իրագործմանը: TASS-ի հաղորդմամբ՝ այս մասին երկուշաբթի հայտնել է Սպիտակ տունը՝ կապված փաստաթուղթը Կոնգրեսի ներկայիս նստաշրջանի ընթացքում օրակարգում ընդգրկելու ներկայացուցիչների պալատի ղեկավարության որոշման հետ: «Օրինագիծն ԱՄՆ-ին թույլ չի տա իրագործել Գործողությունների համատեղ համապարփակ ծրագիրը, քանի որ (Իրանի հետ) համաձայնագրի համաձայն՝ իր պարտավորությունները կատարելու վարչակազմի կարողությունը կախվածության մեջ է դնում միջուկային խնդրի հետ կապ չունեցող կողմնակի հարցերի լուծումից»,- ասվում է Սպիտակ տան հայտարարության մեջ: Ուստի դրանում նշվում է, որ եթե այդ փաստաթուղթը հասնի նախագահի ստորագրմանը, «նա դրա վրա վետո կդնի»: Ավելի վաղ հանրապետական կոնգրեսականների մշակած օրինագիծը, որը պաշտոնապես ուղղված է ահաբեկչության դեմ պայքարին, հաստատել են ներկայացուցիչների պալատի արտաքին գործերի հարցերի և ֆինանսական հարցերի կոմիտեները: Այն նախատեսում է Իրանի դեմ տնտեսական պատժամիջոցների չեղարկում միայն այն դեպքում, եթե Օբամայի վարչակազմը Կոնգրեսին տեղեկացնի, որ իրանական հաստատությունները՝ ներառյալ բանկերը, չեն օգտագործվում իրանական որոշակի կառույցների, մասնավորապես՝ Իսլամական հեղափոխության պահապանների կորպուսի (զինված ուժերի էլիտար ստորաբաժանումներ) ֆինանսավորման համար: Փաստաթղթում այլ կետեր ևս կան, որոնք անհաղթահարելի խոչընդոտներ են ստեղծում 2015թ. հուլիսի 14-ին Վիեննայում Իրանի և միջազգային միջնորդների «վեցյակի» միջև կնքված միջուկային գործարքի իրագործման ճանապարհին:
Հետևեք մեզ Viber-ում
