Վարչապետն անուններ չտվեց, որ ասեմ՝ անմեղության կանխավարկած խախտեց. Քոչարյանի պաշտպան
«Այն, որ ասեց՝ բոլոր ոճրագործները պետք է նստեն ամբաստանյալի աթոռին, լիարժեք համամիտ եմ՝ լավ է ասված»,-Aravot.am-ի հետ զրույցում անդրադառնալով ՀՀ վարչապետ Նիկոլ Փաշինյանի՝ Մարտի մեկի գործի առնչությամբ երեկվա հայտարարությանը, թե բոլոր մարդասպաններն ու ոճրագործները պետք է «նստեն», ասաց Մարտի մեկի գործով մեղադրյալ ՀՀ երկրորդ նախագահ Ռոբերտ Քոչարյանի շահերի պաշտպան, փաստաբան Հայկ Ալումյանը: Ինչ վերաբերում է վարչապետի պնդմանը, թե Մարտի մեկի գործը բացահայտված է, փաստաբանը դրա հետ համամիտ չէ. «Ես նման տեղեկություններ չունեմ»: Հետաքրքրվեցինք, թե Ալումյանի դիտարկմամբ՝ ինչո՞ւ է վարչապետը նշյալ հայտարարությունն անում, երբ դեռ նախաքննությունն անգամ ավարտված չէ: «Գուցե նա համարում է, որ գործը բացահայտված է: Չգիտեմ՝ ի՞նչ տվյալների հիման վրա է նա այդ համոզմունքն ասում, դրա համար չեմ կարող հարցը մեկնաբանել»,-նկատեց փաստաբանը: Հարցրեցինք նաեւ, թե արդյոք վարչապետի խոսքերում անմեղության կանխավարկածի խախտում կար: Հայկ Ալումյանը նշեց. «Նա անուններ չտվեց, որ ասեմ՝ անմեղության կանխավարկած խախտեց»:
Հետևեք մեզ Viber-ում
