Անկարայում Բելգիայի դեսպանին կանչել են Թուրքիայի ԱԳՆ
Թուրքիայի արտաքին գործերի նախարարությունը Բելգիային պաշտոնական բողոք է հայտնել այն բանի առնչությամբ, որ վարչապետ Ահմեդ Դավութօղլուի կողմից Բրյուսել այցելության ժամանակ տեղական իշխանությունները թույլատրել են քաղաքի կենտրոնում կանգնեցնել Քրդական բանվորական կուսակցության (PKK) վրանը:
Ինչպես հաղորդում է թուրքական «Անադոլու» գործակալությունը, Թուրքիայի արտաքին գործերի նախարար Մևլութ Չավուշօղլուն այս հարցով հեռախոսազրույց է ունեցել Բելգիայի փոխվարչապետ և արտաքին գործերի նախարար Դիդիե Ռեյնդերսի հետ:
Հեռախոսազրուցի ընթացքում Չավուշօղլուն անթույլատրելի է համարել «Բելգիայի մայրաքաղաքում ահաբեկչական PKK-ի կողմից վրանի տեղադրումը»: Նա նշել է, որ ԵՄ կենտրոնում նման արարքը որևէ կապ չունի հավաքներ իրականացնելու ազատության իրավունքի հետ՝ հավելելով, թե «ահաբեկչության դեմ պայքարում երկակի ստանդարտներն անընդունելի են»: Խնդրի հետ կապված Անկարայում Բելգիայի դեսպան Մարկ Թրոնթուզուն կանչվել է Թուրքիայի ԱԳՆ, որտեղ նրան են հայտնել Թուրքիայի բողոքը: Թուրքիայի վարչապետ Ահմեդ Դավութօղլուն ԵՄ երկրների ղեկավարների հետ բանակցությունների համար օրերս մեկնել էր Բրյուսել: Այստեղ նրա հյուրանոցի առաջ Քրդական բանվորական կուսակցությունը վրան էր դրել՝ փակցնելով PKK-ի դրոշներն ու առաջնորդների լուսանկարները՝ բողոք հայտնելով քրդերի նկատմամբ թուրքական իշխանությունների վարած քաղաքականության նկատմամբ: Քրդական բանվորական կուսակցությունը ՆԱՏՕ-ի, Եվրամիության, Թուրքիայի և մի շարք այլ երկրների կողմից ճանաչված է որպես ահաբեկչական կառույց: ՄԱԿ-ը, Չինաստանը, Ռուսաստանը, Շվեյցարիան, Հնդկաստանը, Եգիպտոսը PKK-ն ահաբեկչական կառույց չեն համարում:
Հետևեք մեզ Viber-ում
