«Լիդիան Արմենիա»–ի աշխատակից. «Ես ինքս հո իմ երեխայի թշնամին չե՞մ»

«Լիդիան Արմենիա» ընկերության աշխատակիցները կառավարության շենքի դիմաց առավոտվանից ցույց են անցկացնում և հանդիպում են պահանջում Նիկոլ Փաշինյանի հետ, սակայն վարչապետի փոխարեն նրանց ընդունեց  փոխվարչապետ Տիգրան Ավինյանի գրասենյակի ղեկավար Սերժ Սիսեռյանը: Աշխատակիցները նշեցին, որ հանդիպման ընթացքում Սիսեռյանը բացատրել է, որ տեսչական մարմինը ամսվա վերջում կտա իր գնահատականը, և խնդրել է աշխատակիցներին սպասել այդ գնահատականին: Հանդիպումից հետո լրագրողների հետ «Լիդիան Արմենիա» ընկերության աշխատակիցները հայտնեցին, որ պատրաստվում են մի քանի շաբաթ էլ սպասել, մինչև պարզ կլինի հետագա ընթացքը: Ինչպես պատմեցին՝ Տիգրան Ավինյանի գրասենյակի ղեկավարը խոստացել է, որ կխոսի ղեկավար մարմնի հետ, որ աշխատողների իրավունքները չխախտվեն, աշխատողների համար վատ հետևանքներ չլինեն։ «Այո՛, սպասելու ենք, մենք խաղաղ մարդիկ ենք, խաղաղ աշխատակիցներ ենք և եթե վերջնական մեր ակնկալիքը երկու շաբաթվա մեջ կլինի, կարծում ենք՝ ճիշտ կլինի, որ սպասենք»,- ասաց նրանցից մեկը: Մեկ այլ աշխատակից էլ հավաստիացրեց, որ որևէ վտանգ չկա, այլապես ինքը չէր վտանգի ոչ իր, ոչ էլ իր ընտանիքի առողջությունը. «Որևէ մտահոգվելու առիթ չկա, ես ինքս հո իմ երեխայի թշնամին չե՞մ։ Ինքս աշխատում եմ այնտեղ, մասնագիտությամբ կենսաբան-քիմիկ եմ, շատ լավ հասկանում եմ՝ ինչ է այնտեղ կատարվում։ Ես ինքս իմ թշնամին չեմ»։