53 օրվա ընթացքում մենք 3 նամակ ենք ուղղել վարչապետին.«Լիդիան Արմենիայի» աշխատակիցները կառավարության մոտ են

«Լիդիան Արմենիա» ընկերության աշխատակիցները կառավարության շենքի դիմաց ցույց են անցկացնում և հանդիպում են պահանջում Նիկոլ Փաշինյանի հետ։ Ցուցարարներից մեկն ասաց,որ  ցանկանում են իմանալ` ինչն է պատճառը, որ արդեն 53 օր է`   չեն  կարողանում կատարել իրենց աշխատանքային պարտականությունները: «Ռուսաստանից ենք եկել: Ստեղ փորձել ենք մեր ընտանիքը պահել: Հիմա էլ չգիտենք`երբ կաշխատի: Սպասում ենք, մինչև պատասխանը լինի:Եթե վտանգ է ներկայացնում, իմանանք, որ վտանգ է, թողնենք գնանք», - ասաց նա: Հարևան գյուղերի բնակիչներն այսօր եկել են աջակցելու ընկերության աշխատակիցներին, քանի որ, նրանց խոսքով, հանքի շահագործումը որևէ վտանգ չի ներկայացնում։ «Մենք մեր երեխաների թշնամիները չենք», – հայտնում են հավաքվածները։ «Այսպես շարունակվել չի կարող, մենք պետք է հասկանանք` երբ կարող ենք սկսել աշխատել», –  ասաց «Լիդիան» ընկերության աշխատակիցը: Նրա խոսքով` հանքը ոչ միայն անվտանգ է, այլև համապատասխանում է միջազգային չափանիշներին։ Բացի այդ, հանքի շահագործման շնորհիվ շատերն այսօր աշխատանք ունեն։ «Այս 53 օրվա ընթացքում մենք 3 նամակ ենք ուղղել վարչապետին։ Վերջինը երկու օր առաջ է ուղարկվել։ Սակայն որևէ պատասխան չենք ստացել» – ասաց Արշակյանը։ Քանի որ նրանք այժմ հարկադիր պարապուրդում են և չեն աշխատում, ապա չեն գնա այնքան ժամանակ, մինչև չստանան իրենց հարցի պատասխանը,ասացին նրանք: Ամուլսար տանող ճանապարհը 53 օր է, ինչ փակել են բնապահպանները։ Նրանք պնդում են, որ Ջերմուկից 13 կմ–ի վրա գտնվող հանքի շահագործումը միայն այդ շրջանի համար չէ, որ վտանգավոր է։ «Լիդիան» ընկերության աշխատակիցները ճանապարհի արգելափակման պատճառով չեն կարողանում աշխատանքի հասնել։ Հիշեցնենք, որ այսօր Ամուլսարի հարակից համայնքների բնակիչները հայտարարություն են տարածել, որում ասվում է. «Մենք՝ Ամուլսարի շրջակա համայնքների՝ Գորայքի, Սարավանի, Գնդեվազի, Ջերմուկի և այլ համայնքների հազարից ավելի բնակիչներ, արդեն երկրորդ անգամ դիմել ենք վարչապետին և կառավարությանը, կոչ անելով միջամտել՝ վերջ տալ Ամուլսարի ճանապարհների ապօրինի շրջափակմանը և ապահովել արժանապատիվ աշխատելումեր սահմանադրական իրավունքի վերականգնումը։ Այսօր մենք՝ հարյուրից ավելի պատվիրակությամբ այս համայնքերից եկել ենք Երևան և մնալու ենք կառավարության շենքի մոտ՝ մեր ձայնը լսելի դարձնելու կառավարությանը։ Միաժամանակ դիմում ենք Հայաստանի բոլոր իրավապաշտպան կազմակերպություններին՝ մեր կոպտորեն խախտվող իրավունքները պաշտպանելու կոչով։ Մի քանի տասնյակ անձինք՝ հանդես գալով համայնքի անունից, արդեն 50 օր ապօրինաբար զրկել են մեզ աշխատելու իրավունքից։ Այս արարքը ապօրինություն է, և պատկան մարմինները պետք է քայլեր ձեռնարկեն մեր իրավունքները պաշտպանելու ուղղությամբ։ Արդյոք Ամուլսարը համապատասխանում է բնապահպանական նորմերին, պետք է որոշեն համապատասխան կառույցները, և ոչ թե մի խումբ՝ անհայտ աղբյուրներից սնվող օրինազանց մարդիկ։ Մինչդեռ պետությունը այսօր քայլեր չի ձեռնարկում հանքի շինարարության ապօրինի կասեցումը դադարեցնելու և մեր՝ օրինապաշտ քաղաքացիներիս իրավունքները պաշտպանելու և ապօրինություն իրականացնող ինքնակոչ «բնապահպաններից» պաշտպանելու համար։ Մենք ենք համայնքը և մենք ենք իրականում Հայաստանի հպարտ քաղաքացիները: Մեր իրավունքները կոպտորեն խախտվում են։ Հպարտ քաղաքացին աշխատասեր, արժանապատիվ հարկատուն է, ոչ թե մի քանի ամիս անհայտ աղբյուրներից սնվող՝ ուղղորդված ապօրինություն իրականացնողները»։