Մայրը նորածնին մերկ, անօգնական վիճակում թողել էր այգում՝ սալորի ծառի տակ

Ուղիղ մեկ տարի առաջ Պռոշյան գյուղի Տեղերաշեն փողոցում գտնվող այգում՝ սալորի ծառի տակ, իգական սեռի նորածնի հայտնաբերման գործով շուրջ մեկ տարի տևած նախաքննությունն ավարտվել է, և քրեական գործն արդեն դատարանում է: Ավելի վաղ տեղեկացրել էինք, որ նորածնին հայտնաբերումից կարճ ժամանակ անց իրավապահները պարզեցին՝ նորածնին մայրն էր թողել անմշակ այգում՝ մերկ, անօգնական վիճակում: 37-ամյա կինը 2017թ. օգոստոսի 12-ին երեխային ծննդաբերել էր տան պայմաններում՝ պետքարանում, և ցանկանալով նորածնի գոյության փաստը քողարկել հանրությունից, որոշել է երեխայից ազատվել: Քննությամբ հայտնի է դարձել, որ կինը երեխային հիշյալ վայրում է թողել գործով ինքնությունը չպարզված անձի հետ: Նորածնին անօգնական վիճակում հայտնաբերելուց հետո անմիջապես տեղափոխել էին Երևան՝ «Նաիրի» բժշկական կենտրոն, այնտեղից էլ՝ «Սուրբ աստվածամայր» ԲԿ: Կատարված հետազոտություններից հետո պարզ դարձավ նաև, որ երեխան ունի սրտի արատ, մակերիկամների կիստաներ: Կնոջը մեղադրանք է առաջադրվել՝ ՀՀ քրեական օրենսգրքի 128-րդ հոդվածի 2-րդ մասով՝ նրա նկատմամբ որպես խափանման միջոց ընտրելով չհեռանալու մասին ստորագրություն։ Հիշեցնենք, որ 2017թ. մայիսի 15-ին էլ Կոտայքի մարզի Հրազդան քաղաքի Շահումյան փողոցի թիվ 10 հասցեում գտնվող կանաչապատ հատվածում՝ խոտերի վրա՝ թղթե արկղի մեջ, հայտնաբերվել էր արական սեռի նորածին երեխայի դիակ՝ պոլիէթիլենային պարկով փաթաթված: Երեխան 30-ամյա կնոջ երրորդ զավակն է եղել և ծնվել էր առողջ, սակայն ինչպես ավելի ուշ հայտնի դարձավ՝ հենց մայրն էլ նորածնին թողել էր խոտերի վրա՝ արկղի մեջ։  

 Փաստինֆո