Ինչով է պայմանավորված մսի եւ մսամթերքի գների աճը

Հայաստանում մսի եւ մսամթերքի գների բարձրացումը պայմանավորված է անցյալ տարի սննդամթերքի մատակարարման չլուծված խնդրի հետեւանքով անասունների գլխաքանակի կրճատմամբ: Այս մասին NEWS.am-ի թղթակցի հետ զրույցում հայտնեց «Ագրարային- գյուղացիական միություն» ՀԿ-ի նախագահ Հրաչյա Բերբերյանը՝ տեղի ունեցողի համար մեղադրելով ՀՀ գյուղատնտեսության նախարարությանը: Արդյունքում, խոշոր եղջերավոր անասունների գլխաքանակը, ըստ պաշտոնական թվերի, նվազել է 70 հազարով, իսկ ըստ «Ագրարային- գյուղացիական միություն» ՀԿ-ի տվյալներով՝ 90 հազարով, որի ուղիղ կեսը կթան կովերն են, ինչն իր հերթին հանգեցրել է կաթի եւ կաթնամթերքի արտադրության կրճատմանը: «Մսի եւ մսամթերքի գների բարձրացումը նաեւ սպանդանոցների գործունեության հետեւանքն է. դրանց քանակը բավարար չէ սպանդի պատշաճ կազմակերպման համար: Օրինակ, Գեղարքունիքի մարզում մոտ 85 հազար անասուն կա, սակայն այնտեղ գործում է միայն 2 սպանդանոց», - ասաց Հրաչյա Բերբերյանը: Նրա խոսքով՝ նախքան սպանդանոցներում պարտադիր սպանդի պայմանը նախատեսող օրենք ընդունելը, իշխանությունները պետք է ապահովեին սպանդանոցների անհրաժեշտ քանակությունը: «Այժմ սպանդանոցները զբաղվում են փաստաթղթերի վաճառքով, որոնք վկայում են այն մասին, որ կենդանին անցել է իրենց կետով, քանի որ չեն հասցնում սպասարկել այս ծառայության համար պահանջարկի ողջ ծավալը: Բացի այդ, այս ծառայությունների արժեքը բարձրացել է միջինում 10 հազար դրամով»,- նշեց ՀԿ-ի ղեկավարը: Հիշեցնենք, որ 2017 թվականին Հայաստանի խորհրդարանն օրինագիծ էր ընդունել «Սննդամթերքների անվտանգության մասին» եւ «Անասնաբուժության մասին» օրենքում փոփոխություններ կատարելու մասին, որի համաձայն վաճառքի կարելի է հանել բացառապես սպանդանոցներում մորթված կենդանիների միսը: Ազգային վիճակագրական ծառայության տվյալներով՝ հունվար-հունիսի ընթացքում Հայաստանի սպառողական շուկայում մսի արժողությունն ավելացել է 11.8 տոկոսով: