«Հետին պլան չմղել Շանթ Հարությունյանի արդարացման գործը». մի շարք ՀԿ-ներ դիմել են վարչապետին

Վարչապետ Նիկոլ Փաշինյանին Հարգելի պարոն վարչապետ, Թավշյա հեղափոխության ընթացքում, ապա հեղափոխությունից հետո Դուք բազմիցս հայտարարել եք, որ Հայաստանում պետք է բացառվեն այնպիսի արատավոր երևույթներ, ինչպիսիք են կոռուպցիան, կլանային համակարգը, արդարադատության բացակայությունը, մարդու իրավունքների խախտումները, քաղբանտարկյալների գոյությունը։ Սրանք բոլորն էլ առաջնահերթություններ են, որոնց հաղթահարման համար անհրաժեշտ են հրատապ քայլեր ու ժամանակ։ Բայց թվարկված առաջնահերթություններից մեկի՝ քաղբանտարկյալների դեպքում դանդաղելու իրավունք չունենք։ Մարդու իրավունքների ոլորտն անհապաղ քայլեր է պահանջում։ Լուրջ ու շտապ անդրադարձ պետք է լինի ազատազրկման վայրերին։ Դրանք պետք է բեռնաթափվեն։ Պետք է բարելավել պահման պայմանները կալանավայրերում։ Պետք է համակողմանի ուսումնասիրության ենթարկվի ցմահ դատապարտվածների խնդիրը։ Անթույլատրելի է մարդկանց ցմահ ազատազրկման դատապարտել եւ մեկընդմիշտ ջնջել նրանց ու մոռանալ։ Պետք է սկսել Հայաստանում եղած քաղբանտարկյալների արդարացման գործընթաց։ Հայաստանյան և միջազգային իրավապաշտպան կազմակերպությունների կողմից քաղբանտարկյալ ճանաչված Շանթ Հարությունյանը, իր նկատմամբ միայն արդարացման վճիռ է ակնկալում, և այլ ճանապարհով չի պատրաստվում ազատ արձակվել։ Նրա ու նրա ընկերների նկատմամբ ժամանակին իրականացվել է անարդար դատավարություն և հրապարակվել է արարքին ակնհայտ անհամաչափ դատավճիռ։ Կարծում ենք՝ քաղբանտարկյալի կողմից իր նկատմամբ քաղաքական դրդապատճառներով կայացված դատավճռի վերացման և իր արդարացման պահանջը տրամաբանական է և Ձեր կողմից համապատասխան դիրքորոշման հնչեցումը ընկալվելու է ոչ թե որպես դատական իշխանությունների ուղղորդում, այլ հանրային հիմնավոր ակնկալիքների արտահայտում, որը նպաստելու է խնդրի իրավաբանական լուծմանը։ Պետք է վերացվի քաղբանտարկյալի նկատմամբ կայացված անարդար ու պատվիրված դատավճիռը, նա պետք է արդարացվի և ազատ արձակվի։ Դիմում ենք ձեզ առաջարկելով հետին պլան չմղել Շանթ Հարությունյանի և ընդհանրապես քաղբանտարկյալների արդարացման գործը։ Այն այսօր մարդկանց խախտված իրավունքների վերականգնմանն ուղղված անհետաձգելի և անհրաժեշտ քայլ է, որը կազդարարի այլևս առանց քաղբանտարկյալներ Հայաստանի մասին։ Վարդան Հարությունյան Իրավունքի և ազատության կենտրոն Բորիս Նավասարդյան Երևանի մամուլի ակումբ Ավետիք Իշխանյան Հայաստանի հելսինկյան կոմիտե Արթուր Սաքունց Հելսինկյան քաղաքացիական ասամբլեայի Վանաձորի գրասենյակ Լեւոն Բարսեղյան Լրագրողների «Ասպարեզ» ակումբ Սոնա Այվազյան «Թրանսփարենսի ինթերնեշնլ» հակակոռուպցիոն կենտրոն