Ծանր պատասխան Երեւանից՝ Մոսկվայի համար

Երեկ պաշտոնական Երևանն արձագանքեց ՌԴ ԱԳ նախարար Սերգեյ Լավրովի աղմկահարույց հայտարարությանը: ՀՀ ԱԳՆ մամուլի խոսնակ Տիգրան Բալայանը «Արմինֆո» գործակալության հարցին՝ Հայաստանում բուռն արձագանքի արժանացան Մոսկվայից հնչող գնահատականները վերջին շրջանում տեղի ունեցող զարգացումների վերաբերյալ, ինչպե՞ս մեր հասարակությանը կբացատրեք այդ արձագանքները, Բալայանը պատասխանել է․ «Մենք հետևում ենք միջազգային արձագանքներին Հայաստանում տեղի ունեցող ներքին գործընթացների շուրջ, որոնք պայմանավորված են կառավարության ներքին առաջնահերթություններ հանդիսացող իրավական պետության և արդարադատության անկախ համակարգի կայացմամբ, կոռուպցիայի դեմ պայքարով։ Այս գործընթացները փոխկապակցված չեն Հայաստանի արտաքին քաղաքականության հետ և չպետք է տարընթերցման առիթ հանդիսանան։ Այս առնչությամբ վերահաստատում ենք, որ մեր արտաքին քաղաքական առաջնահերթությունները, որոնք հստակորեն ամրագրված են խորհրդարանի կողմից հաստատված կառավարության ծրագրում, ուղղված են հայ-ռուսաստանյան դաշնակցային հարաբերությունների հետագա ամրապնդմանն ու խորացմանը, ՀԱՊԿ և ԵԱՏՄ շրջանակներում փոխգործակցության արդյունավետության բարձրացմանը։ Մենք անշեղորեն հետևում ենք հռչակված ուղեգծին»։ Հիշեցնենք, որ Ռուսաստանի ԱԳ նախարար Սերգեյ Լավրովը նախօրեին ասել էր, թե Հայաստանում տեղի ունեցող իրադարձությունները հակասում են երկրի նոր ղեկավարների հայտարարություններին այն մասին, որ հրաժարվելու են իրենց նախորդների նկատմամբ քաղաքական հետապնդումներից։ Այսպես, պաշտոնական Երևանն անմիջապես փորձում է շտկել իրավիճակը՝ նկատելի լարվածությունը հայ-ռուսական հարաբերություններում՝ վերահաստատելով, որ հայաստանյան գործընթացները փոխկապակցված չեն Հայաստանի արտաքին քաղաքականության հետ: Բայց մի կարևոր նրբերանգ. պաշտոնական Երևանը հիշեցնում է, որ հայաստանյան ներքին գործընթացները պայմանավորված են կառավարության ներքին առաջնահերթություններով, որոնք էլ կապված են իրավական պետության և արդարադատության անկախ համակարգի կայացմամբ, կոռուպցիայի դեմ պայքարով։ Այլ կերպ ասած՝ Հայաստանից Մոսկվային հստակ ասում են, որ նրանց «պաշտպանյալ»-«քաղաքական գործիչները» հնարավոր է սպառնալիք են եղել Հայաստանի իրավական պետությանը, և հիմա հայաստանյան իրավապահները դա են փորձում պարզել: Մյուս կողմից էլ Երևանը շեշտում է, որ Հայաստանի արտաքին քաղաքական առաջնահերթությունները, որոնք հստակորեն ամրագրված են խորհրդարանի կողմից հաստատված կառավարության ծրագրում, ուղղված են հայ-ռուսաստանյան դաշնակցային հարաբերությունների հետագա ամրապնդմանն ու խորացմանը: Այսինքն՝ Հայաստանը հետ չի կանգնում ՀԱՊԿ-ում և ԵԱՏՄ շրջանակներում իր պարտավորություններից։ Ամեն դեպքում, ուշագրավ իրավիճակ է ստեղծվել: Մոսկվան մի կողմից փորձում է խառնվել ՀՀ իշխանությունների, մասնավորապես իրավապահների գործողություններին: Նույնիսկ, կարծես՝ որոշակի ցուցում են տալիս, թե ինչ չի կարելի անել: Մինչդեռ խոսքը գնում է 2008թ․ մարտի 1-ի արյունալի իրադարձությունների մասին, և այս 10 տարիների ընթացքում մշտապես հայտարարվել է, որ Մարտի 1-ը պետք է բացահայտվի: Իսկ այն ժամանակ Հայաստանի նախագահ Ռոբերտ Քոչարյանին, այն ժամանակ պաշտպանության նախարար հանդիսացող Միքայել Հարությունյանին և պաշտպանության փոխնախարար Յուրի Խաչատուրովին երկրի սահմանադրական կարգը տապալելու մեղադրանք է առաջադրված: Գուցե ՀՀ իշխանություններին հաջողվի լեզու գտնել Մոսկվայի հետ, և Ռուսաստանում էլ հասկանան, որ Փաշինյանի իշխանությունն ամենաշատն է շահագրգռված Ռուսաստանի հետ հարաբերությունները խորացնելով: Հնարավոր է, որ Կրեմլում մտավախություն ունեն, որ Մոսկվայի ազդեցությունն է Հայաստանում նվազում: Բացի այդ, այստեղ կա նաև քաղաքականից բացի՝ տնտեսական շահը: Գուցե Մոսկվայում առավել մտահոգ են նաև Ռուսաստանի օլիգարխիայի ազդեցությամբ նվազմամբ Հայաստանում... Թամար Բագրատունի