Խաղ կրակի հետ. Փաշինյանը վերցրեց Մոսկվայի նետած ձեռնոցը

Լրանում է Նիկոլ Փաշինյանի պաշտոնավարման 100 օրը: Այսօր Փաշինյանը ֆեյսբուքյան ուղիղ եթերում հայտարարել է, որ իր պաշտոնավորման 100 օրը կամփոփի օգոստոսի 17-ին հրավիրված հանրահավաքին, որտեղ էլ ներկայացնելու է իր պաշտոնավարման 100 օրվա արդյունքները: «Շուտով լրանում է իմ՝ վարչապետ ընտրվելու 100 օրը, և ես առաջարկում եմ, որ մենք օգոստոսի 17-ին Հանրապետության հրապարակում՝ մեր ավանդական դարձած հանդիպման վայրում, մեծ հանրահավաք հրավիրենք», - ասաց Փաշինյանը՝ շարունակելով․ - «Դուք չգիտեմ ինչպես, բայց ես ձեզ շատ եմ կարոտել: Ես ուզում եմ, որ մենք նորից շփվելու հնարավորություն ունենանք»: Նա շեշտեց, որ սպասվում է չափազանց կարևոր իրադարձություն, որին յուրաքանչյուրի մասնակցությունը անհրաժեշտ է, տեղի է ունենալու կարևոր խոսակցություն այն մասին, թե ինչ է տեղի ունեցել 100 օրվա ընթացքում, կառավարությունն ինչ քայլեր է ձեռնարկել և ձեռնարկելու թռիչքաձև զարգացում ապահովելու համար, նշեց վարչապետը: «Պետք է խոսենք այն մասին, թե ինչ հնարավորություններ ու մարտահրավերներ կան, ինչպես ենք մենք կարողանալու դրանց հետ աշխատել, հնարավորությունները՝ օգտագործել, մարտահրավերները՝ կառավարել: Շատ կարևոր հանդիպում է՝ ապագայի կայուն հիմքերը դնելու և գործնականում Հայաստանի զարգացման մեկնարկը տալու առումով», ասաց Փաշինյանը: Ամենայն հավանականությամբ Փաշինյանն իր իշխանավարման 100 օրվա արդյունքները ներկայացնելու համար հասարակության առջև հանդես գալու մտադրություն ունեցել է ի սկզբանե: Սակայն ուշագրավն այն է, որ նա այս նորությունը հայտնեց Ռուսաստանի ԱԳ նախարարի երեկվա՝ աղմկահարույց հայտարարությունից հետո, որում Լավրովը ոչ ավել, ոչ պակաս արձանագրեց, որ Հայաստանյան զարգացումները հակասում են երկրի նոր ղեկավարների հայտարարություններին, նշեց, որ այն, ինչ կատարվում է Հայաստանում, չի կարող մեզ չանհանգստացնել՝ «այդ թվում նաև ԱՊՀ տարածքի կազմակերպությունների բնականոն աշխատանքի մասով»։ Թեև Սերգեյ Լավրովն իր կարճ հարցազրույցում որևէ քաղաքական գործչի անուն չտվեց, սակայն պարզ էր, որ «քաղաքական գործիչների ձերբակալություններ» ասելով նա նկատի ուներ նախևառաջ Յուրի Խաչատուրովի, ինչպես նաև Ռոբերտ Քոչարյանի կալանավորման որոշումներին: Ռուսաստանի համար ՀԱՊԿ գլխավոր քարտուղարի անվան շուրջ իրադարձությունները ոչ այլ ինչ են, եթե ոչ պատվի հարց: Այս հարցի լրջությունը պետք է գիտակցել, դա կատակ բան չէ: Այսպես ասած՝ ռուսական ՆԱՏՕ-ի գլխավոր քարտուղարին կալանավորման վերաբերյալ որոշում է կայացվել Հայաստանում: Ռուսաստանից ակնկալել, որ նա հեշտ ու հանգիստ կընդուներ այս լուրը ու կհանձներ Խաչատուրովին՝ միամտություն կլիներ: Այսպես, Մոսկվան սկսեց ավելի բաց խաղալ՝ ցույց տալով վերաբերմունքը Հայաստանում տեղի ունեցող իրադարձությունների առիթով: Փաշինյանն էլ պատասխան քայլով ցույց է տալիս, որ վերցնում է Մոսկվայի նետած ձեռնոցը. Լավրովի հայտարարությունից ժամեր անց նա հայտարարեց, որ հանրահավաք է հրավիրում: Փաշինյանն այդ քայլով ցույց է տալու Մոսկվային, որ վայելում է հասարակության աջակցությունը, հետևաբար ամուր կանգնած է, ինչը նշանակում է, որ Ռուսաստանից հայաստանյան ներքաղաքական գործընթացներին միջամտություններն անհարկի են: Ավելին, Փաշինյանն ապագա հանրահավաքն այն աստիճան կարևոր իրադարձություն որակեց, որ գրեթե պահանջում է՝ «յուրաքանչյուրի մասնակցությունը»: Մինչև հանրահավաքը, թերևս, Փաշինյանը կփորձի հարթել հարաբերությունները Մոսկվայի հետ: Այդ հանրահավաքը չի կարող դառնալ հակառուսական հանրահավաք: Փաշինյանը հասկանում է, որ «կրակի հետ» չարժե խաղալ: Առաջիկա օրերին նա կփորձի այնպիսի մարտավարություն մշակել, որը բավարարի թե՛ հասարակությանը, թե՛ մեղմի գերլարված մթնոլորտը հայ-ռուսական հարաբերություններում: Բայց պետք է հաշվի առնել, որ Մոսկվան արդեն մի քանի կարմիր քարտ ցույց տալով՝ Փանիկի դեպքերը, ռուսական մամուլում տարբեր գործիչների սադրիչ հայտարարությունները, այժմ էլ արդեն ՌԴ ԱԳ նախարարի հայտարարությամբ, կարող է գնալ ավելի արագ լուծումների՝ դրանցից բխող բացասական հետևանքներով: Թամար Բագրատունի