Մշակույթի նախարար Լիլիթ Մակունցն այցելել է Գավառի մշակութային հաստատություններ (լուսանկարներ)
Ճանաչողական այցով Գավառ քաղաքի մշակութային միշարք հաստատություններում եղավ ՀՀ մշակույթի նախարար Լիլիթ Մակունցը: «Արմենպրես»-ի փոխանցմամբ՝ նրան ուղեկցում էին ՀՀ մշակույթի նախարարի տեղակալ Վահե Բուդումյանը և Գեղարքունիքի մարզպետ Իշխան Սաղաթելյանը: Նախարարի առաջին կանգառը Գավառի Լ. Քալանթարի անվան պետական դրամատիկական թատրոնում էր: Նա ծանոթացավ արդիականացված թատրոնի շենքային պայմաններին եւ հնարավորություններին: Նախարարը և մարզպետը զրուցեցին թատրոնի տնօրենի և դերասանական անձնակազմի հետ, որոնք բարձրաստիճան հյուրերին ներկայացրին թատրոնի անցած ավելի քան մեկդարյա ճանապարհը, խոսեցին իրենց առաջիկա ծրագրերի և մտահոգող խնդիրների մասին:
Դերասանները նախարարին խնդրեցին աջակցել իրենց՝ Գավառում թատերական ստուդիա հիմնելու հարցում: Լիլիթ Մակունցը, լսելով բոլոր առաջարկները, նշեց, որ բարձրացված հարցերը նախարարությունում լրացուցիչ կուսումնասիրվեն եւ հնարավորության դեպքում կստանան իրենց լուծումները:
Շրջայցի ավարտին նախարար Լիլիթ Մակունցը, Գեղարքունիքի մարզպետ Իշխան Սաղաթելյանը եւ Գավառի քաղաքապետ Գուրգեն Մարտիրոսյանը հրավիրվեցին Գավառ քաղաքի բազմաֆունկցիոնալ երիտասարդական կենտրոն՝ ծանոթանալու կենտրոնի գործունեությանը, իրականացվող ծրագրերին, ապա ունկնդրեցին Գավառ քաղաքի մշակութային հաստատությունների շնորհալի սաների երաժշտական կատարումները:
Հետևեք մեզ Viber-ում
