Ով է պարտադրել հրաժարականի դիմումը

Այսօր հայտնի դարձավ, որ «Ծառուկյան» խմբակցության պատգամավոր Վարդան Բոստանջյանը մանդատից հրաժարվելու դիմում է ներկայացրել ԱԺ նախագահ Արա Բաբլոյանին: Մինչ կուսակցությունը կբացատրեր Բոստանջյանի դիմումի պատճառների մասին, թե իբր պատգամավորը երկարատեւ բուժման նպատակով է վայր դնում մանդատը, մամուլը, հղում անելով իր աղբյուրներին, հրաժարականի այլ պատճառների մասին տեղեկացրեց, համաձայն որոնց՝ Բոստանջյանը հարկադրված է դիմում ներկայացնում, քանի որ ոմանց համար ոչ այնքան հաճելի հայտարարություններ է արել: Ծառուկյան դաշինքը դեռևս հայտարարությամբ հանդես չի եկել ՀՀ երկրորդ նախագահ Ռոբերտ Քոչարյանին կալանավորելու առնչությամբ, սակայն պատգամավոր Վարդան Բոստանջյանը քաղաքական հետապնդման տարրեր տեսնում է։ News.am-ի հետ զրույցում պատգամավորը դա մեկնաբանել է նախկին նախագահին անազատության մեջ պահելու որոշմամբ, մինչդեռ, ըստ նրա, գործը կարելի էր քննել առանց կալանքի որոշման։ Նույն օրը նա աններելի հայտարարություն է արել նաեւ վարչապետի կուսակցության քաղաքապետի թեկնածու Հայկ Մարությանի վերաբերյալ: Կարգին Հայկոյի թեկնածության առիթով պատգամավորը մտահոգություն է հայտնել՝ շեշտելով, որ նման մտահոգություն միայն ինքը չունի։ Մի քանի լրատվամիջոցներ, հղում անելով կուսակցության իրենց աղբյուրներին, գրել են, որ հրաժարումի դիմումը պայմանավորված է նշված հայտարարություններով, ինչը, փաստորեն, չի ներվել պատգամավորին: Զուտ տեսականորեն Բոստանջյանը, իհարկե, ճիշտ է․ ամբողջ աշխարհում է ընդունված, որ պետության նախկին առաջին դեմքերին նախաքննության փուլում կալանավորում են հազվադեպ: Բայց Բոստանջյանն ինչ իմանար, որ նոր Հայաստանում այդպիսի գնահատականներն անգամ կարող են չներվել: Պարզ տրամաբանությունը հուշում է, որ Բոստանջյանին հրաժարականի դիմումը պարտադրվել է ոչ թե հարազատ կուսակցության կողմից, այլ իշխանությունների, որոնք, փաստորեն, ինչպես  չեն հանդուրժում որեւէ այլակարծություն եւ առաջնորդվում են փաշինյանական դեսպոտիզմով: Ի դեպ, նախկին ՀՅԴ-ական Աղվան Վարդանյանը, ով դեմ քվեարկեց Փաշինյանի թեկնածությանը, նույնպես կուսակցությունից հեռացվեց Փաշինյանի հորդորով: Դեռեւս վարչապետի թեկնածու Նիկոլ Փաշինյանը մեր տեղեկություններով չհանդուրժեց, որ ՀՅԴ-ում կարող է լինել մեկը, ով իրեն ոչ հաճո կարծիք  կունենա, ու հորդորեց հին ընկերներին շարքերից հեռացնել Վարդանյանին: Նույնը պետք է աներ Վվարդան Բոստանջյանի պարագայում, մանավանդ, որ վերջինիս որդին եւ Քոչարյանի որդին գործընկերային մտերիմ հարաբերություններ ունեն: Ինչպես նշեցինք՝ Ծառուկյան դաշինքը Քոչարյանի կալանավորման վերաբերյալ չի շտապում հայտարարությամբ հանդես գալ ու դեռ դժվար է ասել՝ արդյոք կուսակցությունում համակարծիք չեն Բոստանջյանի հետ: Հակառակ պարագայում դաշինքը հանդես կգար պարզաբանմամբ եւ կներկայացներ դիրքորոշումը, վերջ կդներ տարատեսակ խոսակցություններին: Քանի դեռ չի արել, ապա բոլոր հիմքերն ունենք մտածելու, որ Բոստանջյանը միակը չէ, ով կարծում է, թե Քոչարյանը քաղաքական հետապնդման է ենթարկվում: Ի դեպ, համանման հայտարարություններ լսվեցինք նաեւ այն ժամանակ, երբ կալանավորվեց Ծառուկյանի թիկնազորի պետը՝ Էդոն: Սակայն Քոչարյանի պարագան այլ է, եւ Ծառուկյանը մտածելու ու զգուշանալու շատ բան ունի, քանի որ իր անունը եւս շրջանառվում է Մարտի 1-ի համատեքստում: Անի Սահակյան