Էլեկտրաշոկ Արցախի՞, թե՞ ՀԱՊԿ-ի համար

Հայաստանը ՀԱՊԿ գործընկեր պետություններին առաջարկել է սկսել գլխավոր քարտուղարի փոխարինման գործընթաց, ասել է ՀՀ արտգործնախարարության մամուլի քարտուղար Տիգրան Բալայանը՝ պատասխանելով ՀԱՊԿ գլխավոր քարտուղար Յուրի Խաչատուրովին Հայաստանում մեղադրանքի առաջադրման առնչությամբ Tert.am-ի հարցին: «Յուրի Խաչատուրովին մեղադրանք է առաջադրվել ՀՔԾ կողմից։ Այս առումով ի՞նչ նշանակություն է ունենալու իր՝ ՀԱՊԿ-ում գլխավոր քարտուղար լինելու վրա, և ընդհանրապես ի՞նչ է լինելու ՀԱՊԿ-ի քարտուղարության հետ, այլ երկրի՞ց պետք է առաջադրվի, թե՞ մեր երկրից ինչ-որ մեկին պետք է առաջադրենք», - այս հարցին, Հայաստանի արտգործնախարարության լրատվության և հանրային դիվանագիտության վարչության հաղորդագրության համաձայն, Բալայանը պատասխանել է. - «Սա խիստ ներքին իրավական գործընթաց է, և Հայաստանում քննվող քրեական գործի շրջանակներում ներգրավված է ՀՀ քաղաքացի։ Միաժամանակ հաշվի առնելով, որ խոսքը գնում է ներկայումս ՀԱՊԿ Գլխավոր քարտուղար պաշտոնը զբաղեցնող անձին առնչվող գործի մասին և մեծ կարևորություն տալով Կազմակերպության հեղինակության և անխափան բնականոն աշխատանքի ապահովմանը, Հայաստանը ՀԱՊԿ գործընկեր պետություններին առաջարկել է սկսել Գլխավոր քարտուղարի փոխարինման գործընթաց»։ «Հայաստանը խիստ հավատարիմ է ՀԱՊԿ ամրապնդման և հզորացման հանձնառությանը ու շարունակելու է ակտիվորեն ներգրավված լինել այդ ուղղությամբ համատեղ աշխատանքներին», հավելել է ԱԳՆ խոսնակը: Այսպես, 2008թ. Երևանի կայազորի պետի, ապա՝ ՀՀ ԶՈւ գլխավոր շտաբի պետ, պաշտպանության նախարարի առաջին տեղակալի պաշտոնները զբաղեցրած Յուրի Խաչատուրովին, ինչպես և Հայաստանի երկրորդ նախագահ Ռոբերտ Քոչարյանին ու պաշտպանության նախկին նախարար Միքայել Հարությունյանին, ինչպես հայտնի է, Մարտի 1-ի գործով մեղադրանք է առաջադրվել սահմանադրական կարգը տապալելու համար: Դատարանը երեկ Խաչատուրովի նկատմամբ խափանման միջոց է ընտրել 5 միլիոն դրամ գրավը: ՀԱՊԿ գլխավոր քարտուղարը դատարանի շենքում պատասխանելով լրագրողների հարցին՝ ասել էր, թե չի ընդունում իրեն առաջադրված մեղադրանքը: Յուրի Խաչատուրովը ՀԱՊԿ գխավոր քարտուղարի պաշտոնը զբաղեցնում է 2017 թվականի ապրիլի 14-ից: Մարտի 1-ի գործով թեմայի վերակենդանացումից, եթե վերանանք՝ Յուրի Խաչատուրովի նկատմամբ մեղադրանքի առաջադրումը լուրջ քայլ է, որովհետև նա ՀԱՊԿ գխավոր քարտուղար է: Այս կառույցի արդյունավետության վերաբերյալ բազմաթիվ անգամներ, բազմաթիվ քննարկումներ են ընթացել, նույնիսկ հարց է բարձրացվել, թե այդ կառույցում մեր ներկայությունը որքանով է նպատակահարմար, եթե այս կառույցի Ադրբեջանի կողմից Հայաստանի սահմանների նկատմամբ ոտնձգությունների ֆոնին նույնիսկ մի փոքր քննադատական հայտարարություն չի ընդունում: Բայց նույնիսկ այս արդարացի քննադատությունները ՀԱՊԿ-ի հասցեին՝ այլ հարց են: Փաստը մնում է փաստ, որ այսօր կա ՀԱՊԿ քարտուղար, որի նկատմամբ մեղադրանք է առաջադրված: Ու պարզ է բոլորի համար, որ նման որոշում առանց ՌԴ-ի իմացության չէր կայացվի: Ու այստեղ հարց է ծագում՝ ինչպե՞ս է Մոսկվան դա թույլատրել, կամ ավելի ճիշտ՝ ի՞նչ նպատակով է այլ «դաբրոն» տրվել: Կարո՞ղ ենք առաջիկայում Ղարաբաղում ռազմական գործողությունների վերսկսման պարագայում ՀԱՊԿ-ից ակնկալել ավելին, քան մինչև հիմա... Հազիվ թե: Բայց այստեղ այլ խնդիր էլ կա՝ կարո՞ղ է ՀԱՊԿ-ում հայաստանյան ներկայացուցչի փոփոխությունն ավելի մեծացնել ադրբեջանական «ախորժակը» ու հայկական կողմից տարածքների հանձնում պահանջվի... Իհարկե, չի կարելի ասել, թե Խաչատուրովի ներկայությունը ՀԱՊԿ-ում Հայաստանի անվտանգության առումով ամրություն է հաղորդել: Նույնիսկ ընդհակառակը՝ ղարաբաղյան ճակատի լարվածությանն ավելացավ նախիջևանյան ճակատում լարվածությունը: Ինչևէ, ըստ ամենայնի Մոսկվան էլ իր հերթին ՀԱՊԿ-ում կարծես այլ «մութ» խմորումների մեջ է, ու Մոսկվայի հետագա քայլերից պատկերը, վստահաբար, ավելի հստակ կլինի: Իհարկե, չի կարելի բացառել ընդամենը տարբերակը, որ Փաշինյանը ՀԱՊԿ-ում իր համար ավելի վստահելի մարդու նշանակման է ձգտում: Թամար Բագրատունի