Մնում է պարզել, թե ով է Բերիան.Վիկտոր Սողոմոնյան
Ռոբերտ Քոչարյանը դեռ մեծ ասելիք ունի քաղաքականության մեջ և շատ շուտով հայտնվելու է ազատության մեջ: Այդ մասին լրագրողների հետ հանդիպմանն ասաց ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը:
«Մենք որևէ մեղք չենք գործել, Ռոբերտ Քոչարյանը մեղքի որևէ զգացողություն չունի: Նա Հայաստան է վերադարձել հանգիստ խղճով, որևէ գործընթացից չի խուսափել», -հայտարարեց Սողոմոնյանը` հավելելով շատ շուտով Քոչարյանը հայտնվելու է ազատության մեջ, քանի որ մեծ ասելիք ունի քաղաքականության մեջ:
«Մենք շատ լավ հիշում ենք, թե ինչ է տեղի ունեցել:Լևոն Տեր-Պետրոսյանն ընտրություններում պարտվելուց հետո փորձել է ԵԿՄ-ին ներքաշել քաղաքական պայքարի մեջ:Հիշում եք, որ հարթակին կանգնած գոռում էին Մանվել, Մանվել: Խոսքը Մանվել Գրիգորյանի մասին է: Գագիկ էին գոռում : Հետո կազմակերպվել են մասսայական անկարգություններ: Դա թավշյա, խաղաղ, ոչ բռնի հեղափոխություն չէր, այն մասսայական անկարգություններ էին, որոնց արդյունքում զոհվեց 10 մարդ: Հիմա ի՞նչ է տեղի ունենում: Որպեսզի արդարացվի այն, ինչն այդ օրերին արվել է ընդդիմության կողմից, պատմությունը վերաշարադրվում է: Ասվում է, որ Տեր-Պետրոսյանը հաղթել է, նրա թիմակիցները ոչ թե մասսայական անկարգություններ է կազմակերպել, այլ ժողովորդի պայքարն է կազմակերպել պարտված թեկնածուի դեմ և գործող նախագահն էլ աբսուրդային պատճառաբանություններով, որի մասին խոսվում է ՀՔԾ տխրահռչակ հաղորդագրության մեջ, ինքն իրեն տապալել է սահմանադրական կարգը: Հիմա դուք ասեք, ո՞վ է հաշվեհարդար տեսնում Քոչարյանի նկատմամբ, ո՞վ է կեղծիք տարածել նրա մասին: Մեզ մնում է պարզել, թե ով է Բերիան: Մենք նրանց գտնելու ենք և նա պատժվելու է: Այստեղ իրավական բեսպրեդել չի լինելու: Պաշտոնական նախագահի նկատմամբ անձնական և քաղաքական հաշվեհարդար չի լինելու: Նախագահն ազատ է արձակվելու, ապօրինի հետապնդողները՝ պատժվեն: Օգտագործելու ենք ցանկացած իրավական և պաշտոնական գործիք»,ասաց նա:
Հետևեք մեզ Viber-ում
