Հայաստանում երկիշխանության ուրվական է շրջում
Երեւանի ավագանու արտահերթ ընտրությունները կարող են բեկումնային դառնալ քաղաքական դաշտում՝ երկրում առաջացնելով երկիշխանություն՝ ի դեմս ԲՀԿ-ի, որը Երեւանը «գրավելու» լուրջ հավակնություններ է դրսեւորում։ Գագիկ Ծառուկյանի թիմը ավագանու ընտրություններին պատրաստվում է ճիշտ այն պահից, երբ Տարոն Մարգարյանը հրաժարական ներկայացրեց։ Տեղեկություններ կան, որ Գագիկ Ծառուկյանը այս անգամ որոշել է միանձնյա որոշումներ չկայացնել ու ներկուսակցական մրցակցության հիմքով որոշել քաղաքապետի թեկնածուին, այն անձին, ով կգլխավորի ավագանու ընտրացուցակը։ Այդ նպատակով նա հարցումներ է պատվիրել բոլոր հավակնորդների վերաբերյալ, որպեսզի արդյունքներից կողմնորոշվի, թե երեւանցին ում է ամենաշատը համակրում։ Մամուլում տեղեկություններ կան թեկնածուների մասին՝ պատգամավորներ Նաիրա Զոհրաբյան, ՀՀՇ-ական, Ծառուկյան դաշինքի պատգամավոր Արարատ Զուրաբյան, Տիգրան Ուրիխանյան, Գեւորգ Պետրոսյան, նախկին պատգամավոր Ռուբեն Գեւորգյան, շրջանառվում է նաեւ Կենտրոն հ/ը-ի հաղորդավար Պետրոս Ղազարյանի անունը, սակայն նա ընդգրկված չէ հարցման ցուցակում։ Նախնական տեղեկություններով առաջատարներն են Արարատ Զուրաբյանը եւ Նաիրա Զոհրաբյանը։ Վերջինս համարվում է ԲՀԿ-ի սիմվոլը եւ քաղաքական տարբեր վայրիվերումների ժամանակ չի դավաճանել կուսակցությանը, դրան զուգահեռ աչքի է ընկել արմատականությամբ ու քաղաքական գործչի իր յուրօրինակությամբ։ Գտնված թեկնածու է նաեւ Արարատ Զուրաբյանը, հատկապես հիմա, երբ վարչապետ Նիկոլ Փաշինյանի թիվ 1 մրցակիցը Գագիկ Ծառուկյանն է ու վերջինիս դեմ գործողություններով նա փաստում է Ծառուկյանի նկատմամբ ունեցած վախերը։ Արարատ Զուրաբյանի ու Նիկոլ Փաշինյանի հարաբերությունները հնուց են եկել ու ավելի կարծրացել մեր օրերում։ Հիշենք Զուրաբյանի խիստ էմոցիոնալ ելույթը վարչապետի թեկնածու Նիկոլ Փաշինյանի մասին, Զուրաբյանը իր ընկերոջը ՝ հերոս Փաշինյանին խորհուրդ տվեց պահպանել իր անվտանգությունը․․․Քարոզարշավի ընթացքում այդ հարաբերությունները կարող են իրենց դերը խաղալ ու մրցապայքարը չսրել մինչեւ վերջին խազը։ Թեեւ մյուս կողմից՝ Նիկոլ Փաշինյանին ճանաչողները գիտեն, որ նա հարաբերություններ պահող չէ եւ գնում է իրավիճակային լուծումների։ Այդ մասին հասկանում են նախեւառաջ ԲՀԿ-ում, որոնք այսօր փաստացի իշխանություն են, բայց գործնականում ավելի վատ դիրքերում, քան նախորդ իշխանությունների ժամանակ։ Ապացույցը Գագիկ Ծառուկյանի թիկնազորի պետի կալանավորումն է։ Ինչ է, նախկինում նույն այդ պետը «հրեշտակային» կյանքով էր ապրո՞ւմ, անշուշտ՝ ոչ, սակայն նա ոչ մի անգամ չի հայտնվել նման կարգավիճակում։ Փաշինյանի տեսակին ծանոթ են նաեւ ՀՀԿ-ականները ու հասկանում են, որ նրա իշխանության մեջ տեղավորվելու շանսերը գրեթե զրոյական են։ Այս համատեքստում անհիմն չեն մամուլի տեղեկությունները, որ ՀՀԿ-ն գուցե ստվերային աջակցություն հայտնի ԲՀԿ-ին, հասկանալով, որ ԲՀԿ-ն է իր վերակենդանացման միակ ճանապարհը։ Վերցնելով Երեւանը ԲՀԿ-ն կվերցնի իշխանության կեսից ավելին, իսկ այդ ժամանակ ՀՀԿ-ԲՀԿ դաշինքը լուրջ մարտահրավեր կներկայացնի Նիկոլ Փաշինյանի իշխանությանը։ Անի Սահակյան
Հետևեք մեզ Viber-ում
