Հայաստանում հակահեղափոխություն չի լինելու, և ես ինձ համարում եմ դրա երաշխավորը. Փաշինյան
Այսօր՝ հուլիսի 26-ին Սանկտ Պետերբուրգում հայ գործարարների հետ հանդիպմանը վարչապետ Նիկոլ Փաշինյանը հայտարարել է‚ Հայաստանում հակահեղափոխություն չի լինելու՝ ընդգծելով‚ որ Հայաստանում կարող է գործունեություն ծավալել միայն այն իշխանությունը, որը հենվում է հեղափոխության արժեքների և տրամաբանության վրա: «Հաճախ եմ լսում այսպիսի փաստարկներ, որ Հայաստանում բիզնեսը պաուզա է վերցրել, սպասում են, որ ընտրություններ լինեն, որից հետո տեսնեն՝ ինչ է տեղի ունենում: Եթե այս տրամաբանությամբ նայենք, մեկ տարի առաջ ընտրություն է եղել, եթե ընտրություններն այդքան շրջադարձային նշանակություն ունեն, դե եղել են դրանք 1 տարի առաջ, ի՞նչ եղավ 1 տարի հետո: Այն փոփոխությունը, որ տեղի է ունեցել Հայաստանում, անշրջելի է: Եթե նույնիսկ հաստատվի այնպիսի իշխանություն, որն ուզենա այդ անիվը հետ պտտել, հաջողություն չի ունենա, նույն ձևով, նույն եղանակով շատ արագ կտապալվի: Հայաստանում հակահեղափոխություն չի լինելու և ես ինձ համարում եմ դրա երաշխավորը»,- ասել է Նիկոլ Փաշինյանը:
Հետևեք մեզ Viber-ում
