Երևանի կոշտ զգուշացումը

Հայաստանի պաշտպանության նախարարի համար հատուկ անհանգստություն է առաջացնում ադրբեջանական զինուժի ակտիվացումը Հայաստանի հետ սահմանի նախիջևանյան ուղղությամբ, որտեղ մինչ այժմ հարաբերական հանգստություն էր: «Այդ հատվածում ռազմական պրովոկացիայի ցանկացած արտահայտում հղի է մեծ ճգնաժամի բորբոքմամբ, որը կառնչվի նաև տարածաշրջանային այլ խաղացողների», ասել է Դավիթ Տոնոյանը EADaily-ին տված հարցազրույցում: Միաժամանակ, Պնախարարը շեշտել է, որ Հայաստանը խաղաղություն խնդրողի կարգավիճակում չէ․ - «Հայաստանի կառուցողական դիրքորոշմամբ հանդերձ, չեմ ցանկանում, որ ձեզ մոտ տպավորություն ստեղծվի, թե Հայաստանը խաղաղություն խնդրողի դերում է: Ադրբեջանական կողմին խորհուրդ եմ տալիս այսքան վստահ չլինել նրանում, որ նա է վերահսկում ռազմական իրավիճակի սրման հարցը: Այսինքն՝ չի լինի այնպես, որ միջնորդներին հաջողվի համոզել հայկական կողմին դադարեցնել պատասխան պատժիչ գործողությունները ադրբեջանական կողմից սանձազերծած ռազմական գործողությունների վերսկսման պարագայում՝ Բաքվի կողմից նույնիսկ սահմանափակ մասշտաբով ռազմական գործողություններ իրականացնելու դեպքում: 2016թ. ապրիլյան ագրեսիայի սցենարի կրկնության դեպքում հայկական կողմը կարող է և զերծ չմնալ իր զինանոցում առկա բոլոր զինատեսակների կիրառման «գայթակղությունից»՝ հակառակորդին տալով մասշտաբային և որոշիչ հակահարված»: Անդրադառնալով արցախա-ադրբեջանական շփման գծում Ադրբեջանի կողմից ռազմական տեխնիկայի և մարդկային ուժի կուտակման մասին հարցադրմանն ու լայնամասշտաբ ռազմական գործողությունների վերսկսման վտանգին՝ Տոնոյանը նկատել է, որ լայնամասշտաբ ռազմական գործողությունների վերսկսման հավանականությունը միշտ մեծ է բանակցությունների ընթացում Բաքվի առավելապաշտական պահանջների պայմաններում: «Ադրբեջանական զինուժի ակտիվացման և կուտակումների մասին հաղորդագրությունները ճիշտ են, և նմանատիպ գործընթացները դիտարկվում են ոչ միայն արցախա-ադրբեջանական շփման գծում, այլև Հայաստանի և Ադրբեջանի պետական սահմանին, մասնավորապես՝ նախիջևանյան ուղղությամբ: Ադրբեջանի պահվածը ոչ այլ ինչ է, քան ուժի կիրառման սպառնալիք, մինչդեռ հենց ուժի կիրառման բացառումն է դրված ԼՂ-ի հակամարտության կարգավորման խաղաղ գործընթացի հիմքում, ինչպես ցանկացած այլ կոնֆլիկտի», - ասել է Տոնոյանը: Հայաստանի պաշտպանության նախարարի ուղերձը հստակ է: Նա ուղղակի զգուշացրեց Ալիևին, որ ագրեսիայի դեպքում Հայաստանը կարող է չզսպել իրեն և որ զինանոցում առկա բոլոր զինատեսակները կկիրառվեն հակառակորդի նկատմամբ: Այս փուլում, երբ միջնորդները փորձում են պահպանել բանակցությունների շարունակականությունը, կարելի է ասել՝ բանակցությունների սեղանի շուրջ նստեցնել կողմերին, Ալիևը Հայաստանում տեղի ունեցած հեղափոխությունից հետո, որոշեց, որ սահմաններում պետք է ամրանա: Ուստի այս պայմաններում, թեև հայկական կողմը հայտարարել է, որ պատրաստ է խաղաղ բանակցությունների՝ կարևոր է, որպեսզի հայկական կողմը նաև ուժի դիրքերից խոսեր Ալիևի հետ՝ անկախ դիվանագիտական ջանքերից: Իհարկե Հայաստանը խաղաղություն խնդրողի կարգավիճակում չէ, բայց և հայկական կողմը պետք է մտածի, թե ինչպես Ադրբեջանին պարտադրի խաղաղություն, իսկ դա երբեմն հնարավոր է Ալիևին զգուշացնելով՝ համարժեք «ուժային» բառապաշար գործածելով: Թամար Բագրատունի