«Նիկոլն ինձ սիրահարվեց առաջին հայացքից». Աննա Հակոբյանի հարցազրույցը Eg.ru-ին

ՀՀ վարչապետ Նիկոլ Փաշինյանի կինը՝ Աննա Հակոբյանը, Մոսկվա այցի շրջանակում հարցազրույց է տվել ռուսական EG.RU-ին՝ պատմելով իր ընտանիքի, աշխատանքի, նոր պարտականությունների ու երազանքների մասին: Նա պատմել է Նիկոլ Փաշինյանի հետ ծանոթության ու իրենց սիրո պատմության մասին։ «Մեր ծանոթության և սիրո պատմությունը Հայաստանում շատերին է հայտնի: Ռուս ընթերցողի համար ես կպատմեմ: Մենք ծանոթացել ենք դեռ ուսանողական տարիներին, երբ Նիկոլը Երևանի պետական համալսարանի լրագրության ֆակուլտետի հինգերորդ կուրսի ուսանող էր, իսկ ես նոր էի ընդունվել նույն ֆակուլտետ: Երբ ես մտա լսարան, անմիջապես լսեցի այդ անունը՝ Նիկոլ Փաշինյան: Նրա մասին բոլորը խոսում էին՝ դասախոսները, դեկանը, ուսանողները: Նրանով հիանում էին, նրան օրինակ էին բերում, նրա աշխատանքները վկայակոչում էին: «Նիկոլը ֆակուլտետի հպարտությունն է»՝ լսում էի ես՝ դեռ ծանոթ չլինելով հերոսին»,- պատմել է Աննա Հակոբյանը: Այնուհետ առաջին կուրսի ուսանողուհի Աննան առաջադրանք է ստացել հոդված գրել թերթում, որտեղ այդ ժամանակ աշխատում էր ապագա ամուսինը: «Ես գրեցի և հոդվածը բերեցի խմբագրություն: Այդպես էլ ծանոթացանք՝ աշխատավայրում: Նիկոլն առաջին հայացքից սիրահարվեց ինձ, իսկ ես՝ մի փոքր ավելի ուշ»,- ասել է Աննա Հակոբյանը: Աննա Հակոբյանը պատմել է նաև իր երազանքների մասին։ Պարզվում է՝ նա մանկուց երազում է ճանապարհորդել Աֆրիկայով: «Սակայն այժմ ես նախընտրում եմ հանգստանալ Հայաստանում, մենք մեծ ընտանիք ունենք, և մեր փոքր դստեր համար շատ դժվար կլինի այլ երկրներ մեկնել»,- ասել է նա: Աննա Հակոբյանը պատմել է, որ այժմ նա նոր գաղափարներ է փնտրում, ուսումնասիրում է կյանքը «փոքր-ինչ այլ կողմից»: «Ինձ համար, սակայն, ինչպես և նախկինում, մարդկանց մեջ կարևոր են մնում ազնվությունը, ազատությունը, բարությունը և արդարությունը»,- ասել է նա: