Ողբերգական ավտովթար Շիրակի մարզում․ բախվել են Toyota Sequoia-ն և ЗиЛ-ը․ կա 1 զոհ, 4 վիրավոր

Այսօր, հուլիսի 23-ին ողբերգական ավտովթար է տեղի ունեցել Շիրակի մարզում։ Ժամը 18։00-ի սահմաններում Արթիկ - Գյումրի ավտոճանապարհի Սարալանջ գյուղի վարչական տարածքում բախվել են Toyota Sequoia մակնիշի 58 VՕ 888 համարանիշի և ЗиЛ մակնիշի 14 ԼU 235 համարանիշի ավտոմեքենաները։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի մահացել է, 4 հոգի տեղափոխվել են Արթիկի հիվանդանոց։ Դեպքի վայր են ժամանել Ճանապարհային ոստիկանության 2-րդ սպայական գումարտակի 2-րդ վաշտի 2-րդ դասակի ծառայողները վաշտի հրամանատար Վաչե Մալաքյանի, դասակի հրամանատար Ռաֆայել Ասրյանի գլխավորությամբ։ Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Յուրա Հովհաննիսյանը տեղեկությունը փոխանցել է Ոստիկանության Արթիկի բաժին, որտեղից ժամանել է օպերատիվ խումբը բաժնի պետ Մինո Մխիթարյանի գլխավորությամբ։ Տեղում քննչական աշխատանքները ղեկավարում է Հայաստանի քննչական կոմիտեի Շիրակի մարզային քննչական վարչության Արթիկի քննչական բաժնի ավագ քննիչ Նարեկ Մանանդյանը, ում կողմից փաստի առթիվ հարուցվել է քրեական գործ՝ ՀՀ ՔրՕրի 242 հոդվածի 2-րդ մասի հատկանիշներով։ Ոստիկանությունը ու քննչական բաժինը պարզում են վարորդների, մահացածի, վիրավորների ինքնությունը։ Դեպքի վայրում հավաքվածները ասում են, որ վիրավորներին առաջինը օգնության են հասել քաղաքացիները և Արտակարգ իրավիճակների նախարարության Փրկարար ծառայության Արթիկի հրշեջ - փրկարարները։ Գ․ Շամշյանի տեղեկություններով՝ Toyota Sequoia-ն հաշվառված է Շիրակի մարզի Փոքր Մանթաշ գյուղի բնակիչ 44-ամյա Ժիրայր Հակոբյանի անվամբ, իսկ ЗиЛ-ը Արթիկ քաղաքի բնակիչ 65-ամյա Արամ Հովսեփյանի անվամբ։ Գ․ Շամշյանի տեղեկություներով, ЗиЛ-ի վարորդը ինքնակամ ներկայացել է ոստիկանություն։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: