Ռուսները մինչև «վերջին խազ» Փաշինյանի վարչապետությունը «ջրիկանցում» են
Ռուս պրանկերներ Վովան՝ Վլադիմիր Կուզնեցովը և Լեքսուսը՝ Ալեքսեյ Ստոլյարովը, Հայաստանի վարչապետ Նիկոլ Փաշինյանի անունից հերթական զանգն են կատարել եվրոպացի բարձրաստիճան պաշտոնյային: Ի դեպ, սա արդեն երրորդ դեպքն է: Այս անգամ էլ ռուս պրանկերները զանգահարել են Եվրահանձնաժողովի նախագահ Ժան-Կլոդ Յունկերին՝ քննարկելով նրա հետ միջազգային իրադրությունը, ապա նրան հրավիրել են Երևան՝ խորոված ուտելու: Պրանկերները խոսել են նաև ԵՄ արտաքին հարաբերությունների և անվտանգության քաղաքականության հարցերով բարձր ներկայացուցիչ Ֆեդերիկա Մոգերինիի հետ: Եվ ի դեպ, տեղեկատվություն տարածեց ոչ ավել, ոչ պակաս «ՌԻԱ Նովոստին»: Իսկ հեռախոսազրույցը, որի ձայնագրություններն ունի «ՌԻԱ Նովոստի»-ն, արվել է, փաստացի, Փաշինյանի՝ վարչապետ ընտրվելուց կարճ ժամանակ անց: Յունկերի հետ զրույցում պրանկերները դժգոհել են ԱՄՆ կողմից ճնշման առկայությունից, ինչին ի պատասխան Եվրահանձնաժողովի նախագահը հայտարարել է, որ իրենք ստիպված են «կրկին ու կրկին բացատրել պարոն Թրամփին, թե որն է աշխարհի կարգը»: «Նա չի հասկանում, թե ինչ է տեղի ունենում: Մենք պետք է համոզվենք, որ նա կսկսի ավելի լավ գիտակցել Հայաստանում տեղի ունեցող իրադարձությունները: Շատ լավ: Հաջողություն եմ ցանկանում»,- ասել է Յունկերը: Պրանկերները նրան հրավիրել են Երևան, որտեղ առաջարկել են հրապարակում խորոված պատրաստել և «յուրօրինակ ցույց» անցկացնել: «Վատ չի հնչում: Ես կայցելեմ մյուս տարի: Այս տարի դա այլևս հնարավոր չէ, իսկ գալիք տարում մենք կգտնենք համապատասխան ժամկետներ ու հնարավորություններ»,- ասել է Յունկերը: Իսկ Փաշինյանի անունից պրանկերների հետ զրույցում Մոգերինին նշել է, որ Հայաստանի նոր իշխանությունները պետք է լավ հարաբերություններ ունենան բոլոր գործընկերների հետ: «Մենք պետք է զգուշավոր գործենք: Հայաստանն այն երկիրն է, որն ունի իրավունք ընտրություն անելու»,- ասել է ԵՄ հանձնակատարը: Հիշեցնենք, որ ավելի վաղ ռուս պրանկերները Փաշինյանի անունից զանգահարել էին Մեծ Բրիտանիայի արտաքին գործերի նախարար Բորիս Ջոնսոնին և զրուցել շուրջ 30 րոպե, ինչպես նաև ԵԱՀԿ գլխավոր քարտուղար Թոմաս Գրեմինգերին: Ռուսների «ջրիկանալու» ախորժակն, արդեն նմանվում է կոնկրետ քաղաքականության: Երեք անգամ Հայաստանի վարչապետի անունից զանգերը բարձրաստիճան պաշտոնյաների չի կարելի կատակ համարել, որքան էլ դա արվում է կատակի քողի ներքո: Ի՞նչ է Մոսկվան ցանկանում հասկացնել Նիկոլ Փաշինյանին... Որ նրան լուրջ չի՞ վերավերում, որ նրան Հայաստանի ղեկավար չի՞ համարում... Թերևս, Մոսկվայից այս «ջրիկ» մեսիջներն ուղղված են հենց Նիկոլ Փաշինյանին, որն շարունակաբար ցանկանում է Վլադիմիր Պուտինին վստահեցնել, որ Հայաստանն ուզում Ռուսաստանի հետ հարաբերությունները խորացնել: Ինչպես երևում է, Փաշինյանի այդ «մեսիջն» էլ առանձնապես լուրջ չի ընկալվում: Ահա, այսպիսին են ռուսական վերաբերմունքը Նոր Հայաստանին. մի օր Հայաստանի գյուղերում են իրենց դիրքորոշումն արտահայտում՝ ռուսական ռազմաբազայի զինծառայողները դուրս են գալիս, ու սկսում կրակել գյուղի տների ուղղությամբ, հետո ներողություն հայցում ու ասում, թե տեղեկացրել էին պատկան մարմիններին, մի օր էլ Հայաստանի վարչապետի անունից զանգեր են կատարում բարձրաստիճան պաշտոնյաներին: Մետաքսյա Շալունց
Հետևեք մեզ Viber-ում
