Թուրքիային մերժեցին
Եվրախորհրդարանը Թուրքիայի համար չի պարզեցնի վիզաների չեղարկման ընթացակարգը, ամեն ինչ պետք է ազնիվ լինի: Այս մասին հայտարարել է ԵԽ ղեկավար Մարտին Շուլցը Բրյուսելում ԵՄ գագաթնաժողովի բացմանը՝ փոխանցում է TASS-ը: «Եվրախորհրդարանը պատրաստ է կառուցողական դեր խաղալ, սակայն կա երկու պայման: Առաջինը՝ մեր խորհրդարանական ընթացակարգի ոչ մի կրճատում չի կարող լինել: Դա լուրջ որոշում է»,- ասել է նա: Նրա խոսքով՝ չի կարելի մոռանալ, որ ԵՄ-ն վիզաների ազատականացման հարցով երկխոսություններ է վարում նաև այլ տարածաշրջանների և երկրների հետ՝ Վրաստանի, Ուկրաինայի ու Կոսովոյի ինքնահռչակ հանրապետության: «Եվ մենք պետք է ազդանշան հղենք, որ յուրաքանչյուր երկրի հետ ազնիվ ենք վարվում»,- նշել է Շուլցը: Եվրամիությունը Թուրքիայի հետ գործընկերության կարիք ունի, ոչ թե նրանից կախվածության: «Ինչպես ես արդեն ասել եմ՝ Թուրքիան և ԵՄ-ն առանցքային գործընկերներ են: Եվ մեզ պետք է գործընկերություն, ոչ թե Թուրքիայից կախվածություն»,- ասել է նա: ԵՄ-ին Թուրքիայի անդամակցության և միգրացիոն ճգնաժամի լուծման բանակցությունները պետք է առանձին տարվեն՝ ընդգծել է Շուլցը: Եվրախորհրդարանի ղեկավարը կարծում է, որ Թուրքիա ներգաղթյալների վերադարձի մասին համաձայնագիրը պետք է կնքվի ԵՄ ներկայիս գագաթնաժողովում:
Հետևեք մեզ Viber-ում
