Դիտորդական առաքելության քողի տակ բազմաթիվ կուսակցություններ շրջանցում էին այդ արգելքը. Դանիել Իոաննիսյան

Կառավարությունում Ընտրական օրենսգրքի փոփոխությունների շրջանակում քաղաքացիական հասարակության ներկայացուցիչների հետ տեղի ունեցած հանդիպման ժամանակ  հանձնաժողովի քարտուղար Դանիել Իոաննիսյանը նշժել է, որ պետք է վերահսկել, թե ովքեր են դիտորդ դառնում, որովհետև կան անձինք, որ իրավունք չունեն դիտորդ լինել: «Նախորդ ընտրություններում մենք ունեցել ենք 28 հազար հավատարմագրված դիտորդ, որոնցից հաստատ 5000-ից քիչն էր, որ իրապես դիտորդ էր և իրապես դիտորդություն էր իրականացնում, իսկ շուրջ 20 հազար մարդ, ես վստահ եմ, որ դիտորդի անվան տակ ուղղակի տեղամասում վստահված անձ էր, ինչը խնդրահարույց է, որովհետև ամեն դեպքում ԸՕ-ն ենթադրում է, որ կուսակցության ներկայացուցիչները մեկ ընտրատեղամասում պետք է սահմանափակված լինեն։ Այնինչ, դիտորդական առաքելության քողի տակ բազմաթիվ կուսակցություններ շրջանցում էին այդ արգելքը»,- նկատեց Իոաննիսյանը։ Դ.Իոաննիսյանը հայտնեց, որ ընտրություններում տեղամասային հանձնաժողովներում դիտորդների և լրագրողների թվի սահմանափակում չի լինելու: Նա տեղեկացրեց, որ դիտորդներին, լրագրողներին ընտրատեղամասից հեռացնելու ինստիտուտը դեռևս պահպանվում է, բայց փոփոխություններ կլինեն: Ինչպես նաև՝ նախատեսվում է նաև կրճատել հավատարմագրման ժամկետները՝ գործող 15 օրվա փոխարեն՝ մինչև 10-12 օր: