Նիկոլի վենդետան ու գործընկերների «հաշվեհարդարը»
Նիկոլ Փաշինյանը վենդետա է սկսել նույնիսկ կոալիցիոն գործընկերների նկատմամբ՝ ցույց տալով, որ իրենց հետ համագործակցությունը կայացել է պարտադրված՝ ելնելով սեփական շահերից, բայց այսուհետ չի պատրաստվում հաշվի նստել նրանց հետ, ըստ էության այն պատճառով, որ նախկինում Փաշինյանն անձամբ է քննադատել ԲՀԿ-ին ու ՀՅԴ-ին՝ ՀՀԿ-ի կցորդը լինելու հարցում։ Գործընկերների նկատմամբ արհամարհական վերաբերմունքը դրսեւորվեց մի քանի օր առաջ։ Ընտրական օրենսգրքի շուրջ քննարկումների ընթացքում կառավարությանն առընթեր հանձնաժողովի քարտուղար Դանիել Իոաննիսյանն առանց վարանելու հայտարարեց, թե ով ինչ կարծիք ուզում է հայտնի, միեւնույն է, կառավարությունը իր նախագիծն է առաջադրելու ու ոչ մեկ չի կարող նրան պարտադրել հաշվի նստել քաղաքական ուժերի առաջարկների հետ։ Կառավարության լիազոր ներկայացուցչի այս հայտարարությունը ոտքի է հանել կոալիցիոն գործընկերներին։ ԲՀԿ -ական Նաիրա Զոհրաբյանը վաղը պատրաստվում է առաջարկել, որպեսզի Ընտրական օրենսգրքի նախագծի շուրջ քննարկումներից խորհրդարանական ձևաչափը դադար վերցնի: «Մենք առաջարկում ենք, որ երկու ֆորմատները համատեղվեն, բայց կարծես կառավարության համար դա ընդունելի չէ, եթե իհարկե Դանիել Իոաննիսյանը ներկայացնում է կառավարության տեսակետը: Այս փուլում ես չեմ տեսնում, թե ի՞նչ պետք է անի խորհրդարանական ֆորմատը»,- ասաց նա: Քննարկումներից նա տպավորություն չի ստացել, թե Նիկոլ Փաշինյանը ցանկանում է շրջանցել իր նախկին հայտարարությունները`ԸՕ փոփոխությունների եւ արտահերթ ընտրությունների շուրջ պայմանավորվածություններում կոնսենսուսով առաջնորդվելու մասին: Զոհրաբյանն ամեն օր խորհրդակցությունների մեջ է առաջին փոխվարչապետ Արարատ Միրզոյանի հետ եւ ոչ նրանից, ոչ էլ վարչապետ Նիկոլ Փաշինյանից նման բան չի լսել: Դժգոհությունը չի թաքցրել նաեւ ՀՅԴ խմբակցության ղեկավար Արմեն Ռուստամյանը։ «Քաղաքական ուժերը, նրանք որոնք Ազգային ժողովում կան, բացի ՀՀԿ-ից, արտացոլված են նաև կառավարությունում: Կառավարության մեջ մեր ներկայացուցիչներն ի՞նչ պետք է անեն, նորից առաջանալու է այդ հարցը, եթե կառավարությունը փորձի իր նախագիծը ներկայացնել: Մենք, օրինակ, պետք է պաշտպանենք այն թեզերը, որոնք համաձայնեցրել ենք և որոնք մեզ համար ընդունելի են: Մենք չենք ուզում, որ այդ վիճակն առաջանա, մենք ուզում ենք հանգել կոնսենսուսային ինչ-որ նախագծի»,- ասաց նա՝ հավելելով, որ նույն այդ կոնսենսուսով էլ պետք է գնալ արտահերթ ընտրությունների: Ռուստամյանի խոսքով՝ ճիշտ կլինի, որպեսզի արտահերթ ընտրությունն անցկացվի քաղաքական ուժերի համաձայնությամբ, որպեսզի շատ հարցեր սահուն լինեն: Հիշեցնենք, որ Ընտրական օրենսգրքի մշակման հարցով ստեղծված մասնագիտական հանձնաժողովի առաջարկներին խորհրդարանական ուժերը համաձայն չեն: Ռուստամյանն ասաց, որ առայժմ իրենք հակված են կարծել, թե այդ առաջարկները հանձնաժողովի քարտուղար Դանիել Իոաննիսյանի տեսակետն են, ոչ թե կառավարության: «Մենք այսօր պաշտոնապես դրա հիման վրա չենք կարող ասել, որ կառավարության տեսակետն է: Պետք է ձգտել չգնալ երկու նախագծերի ճանապարհով, այլ համաձայնեցնել տեսակետները, գտնել այն ընդունելի տարբերակը, որի հիման վրա կարող է ձևավորվել կոնսենսուս»: Հարցին, թե իրենց կարծիքով՝ կառավարությունը հաշվի չի՞ առնում կուսակցությունների տեսակետն այս հարցում, Արմեն Ռուստամյանը պատասխանեց, որ չի ուզում իր որոշ տպավորությունների մասին բարձրաձայնել: «Ես իսկապես կոչ կանեի, որ որևէ մեկը չփորձեր սեփականացնել ճշմարտությունը և պարտադրել իր տեսակետը: Դա մեզ երբեք լավ տեղ չի տանի, անցել ենք այդ ճանապարհը: Միշտ պետք է փոխզիջումների ճանապարհ ունենալ, անզիջում ու կոշտ դիրքորոշումները խափանում են համաձայնությունները»։ Հիշեցնենք, որ ՀՀԿ-ականները հենց այդ նիստի ընթացքում էին Իոաննիսյանին դաստիարակչական խորհուրդներ տվել, սակայն, երբ խնդրի մասին բարձրաձայնում են կոալիցիոն գործընկերները, սա արդեն լրջացնում է հարցը, քանի որ ստացվում է, որ Նիկոլ Փաշինյանը թքած ունի Վենետիկի հանձնաժողովի պահանջին՝ կոնսեսուսային նախագիծ ընդունելու հարցում։ Անի Սահակյան
Հետևեք մեզ Viber-ում
