ՆԱՏՕ-ն և ղարաբաղյան հարցը

ԱՏՕ-ն ղարաբաղյան հակամարտության կողմերին կոչ է անում քաղաքական կամք դրսեւորել եւ բանակցությունների միջոցով լուծել հակամարտությունը։ ՆԱՏՕ-ի գլխավոր քարտուղար Յենս Ստոլտենբերգին ուղղված «Ազատություն» ռադիոկայանի հայկական ծառայության հարցերին ի պատասխան՝ Դաշինքը կողմերին կոչ է արել կառուցողական լինել։ «Դաշնակիցների համար նման ձգձգված հակամարտությունների շարունակականությունը հատուկ մտահոգության առիթ է։ Մենք շարունակում ենք Կովկասյան տարածաշրջանում խաղաղությունն ու կայունությունը դիտարկել որպես եվրատլանտյան անվտանգության հիմնարար տարր։ Մենք շարունակելու ենք համագործակցել տարածաշրջանի երկրների հետ՝ ե՛ւ քաղաքական, ե՛ւ գործնական առումներով»,- նշված է Ստոլտենբերգի պատասխանում։ ՆԱՏՕ-ն շեշտում է, որ հակամարտությունը ոչ միայն մտահոգության առիթ է, այլեւ «խանգարում է տարածաշրջանի ժողովուրդներին՝ որպես եվրատլանտյան համայնքի անդամների, հասնել իրենց ամբողջական ներուժին»։ Ի պատասխան  հարցին, արդյո՞ք Ղարաբաղը նույնպես պետք է մասնակցի բանակցություններին, Դաշինքը հայտարարել է, որ բանակցությունների հարցում թեեւ դերակատարում չունեն, բայց շահագրգռված են այս գործընթացում եւ քաջալերում են բոլոր կողմերին՝ շարունակել խաղաղ հանգուցալուծմանն ուղղված ջանքերը։ Հյուսիսատլանտյան դաշինքը հայտարարել է նաեւ, որ շարունակում է աջակցել Հայաստանի եւ Ադրբեջանի տարածքային ամբողջականությանը, անկախությանը եւ ինքնիշխանությանը։ Այս համատեքստում Դաշինքը կշարունակի աջակցել բոլոր ջանքերին, որոնք ուղղված են Հարավային Կովկասում առկա հակամարտությունների խաղաղ հանգուցալուծմանը՝ «հիմնված այս սկզբունքների եւ միջազգային օրենքի, ՄԱԿ-ի Խարտիայի եւ Հելսինկյան եզրափակիչ ակտի վրա»։ ՆԱՏՕ-ն հրաժարվել է կարծիք հայտնել, թե ինչպես է հնարավոր խուսափել առաջնագծում մարդկային կորուստներից, եւ արդյո՞ք դիպուկահարները պետք է հեռացվեն առաջնագծից։ «Բանակցային ջանքերն առաջ մղողը ԵԱՀԿ Մինսկի խումբն է։ Մենք ամբողջությամբ աջակցում ենք Մինսկի խմբի դերակատարությանը եւ առանձին ՆԱՏՕ-ի դերակատարության կարիք չենք տեսնում։ ՆԱՏՕ-ի քաղաքականությունը Հարավային Կովկասում չի փոխվել»,- ասված է պատասխանում։