Հեյդար Ալիևի` «Մեկ ազգ, երկու պետությունը»
Ադրբեջանի նախագահ Իլհամ Ալիևը երեկ պաշտոնական այցով Թուրքիայում էր: Ըստ նախնական պայմանավորվածության՝ Թուրքիայի նախագահ Էրդողանը պետք է լիներ Բաքվում, սակայն կիրակի երեկոյան Անկարայում տեղի ունեցած ահաբեկչության պատճառով որոշվեց Թուրքիա-Ադրբեջան բարձր մակարդակով ռազմավարական համագործակցության 5-րդ նիստը անցկացնել Թուրքիայի մայրաքաղաքում: Էրդողանն ու Ալիևը երեկ հերթական անգամ «եղբայրական» հարաբերությունների և «մեկ ազգ, երկու պետություն» ցուցադրությունն էր` բուռն ծափահարությունների ներքո... Առավոտյան նախագահ Էրդողանը ադրբեջանցի գործընկերոջը դիմավորել է Անկարայի նախագահական պալատում: Մի շարք նախարարների և բարձրաստիճան պաշտոնյաների մասնակցությամբ պաշտոնական արարողությունից հետո նախագահները առանձնազրույց են ունեցել, ապա մասնակցել երկկողմ համագործակցության նիստին: Նիստից հետո համատեղ ասուլիսում Թուրքիայի նախագահը ևս մեկ անգամ դատապարտել է Անկարայի ահաբեկչությունը՝ ընդգծելով՝ ահաբեկիչները չեն հասնելու իրենց նպատակին և երբեք չեն կարողանալու ծնկի բերել Թուրքիային, ընդհակառակը, իրենք են ծնկի գալու: Էրդողանը շնորհակալություն է հայտնել պաշտոնական Բաքվին ցուցաբերած աջակցության համար և հայտարարել, որ եղբայրական Ադրբեջանը Թուրքիայի սև օրվա բարեկամն է: Ալիևն իր հերթին հայտարարել է, որ Թուրքիան և Ադրբեջանը այսօր աշխարհում ամենամտերիմ երկրներն են: Նա նշել է, որ Թուրքիան Էրդողանի կառավարության շրջանում մեծ զարգացում է ապրել, ինչը ամենից շատ Ադրբեջանին է ուրախացնում: Ալիևը հատուկ երախտագիտություն է հայտնել Թուրքիային Լեռնային Ղարաբաղի հարցում մշտապես Ադրբեջանի կողքին լինելու համար: Թուրքիա-Ադրբեջան բարձր մակարդակով ռազմավարական համագործակցության 5-րդ նիստի արդյունքում երկու երկրների միջև վեց համաձայնագիր է ստորագրվել հիմնականում էներգետիկայի, տրանսպորտի և ռազմական ոլորտներում համագործակցության շուրջ: Թուրքական մամուլը Ալիևի այցը բարեկամական ժեստ է որակել՝ հիշեցնելով, որ Էրդողանի այցը Ադրբեջան հետաձգվում է արդեն երկրորդ անգամ՝ ահաբեկչական հարձակումների պատճառով: Թուրքիայի ու Ադրբեջանի նախագահների` տետ-ա-տետ ձևաչափով հանդիպումից հետո մեկնարկել է Թուրք-ադրբեջանական բարձր մակարդակի ռազմավարական համագործակցության խորհրդի 5-րդ նիստը։ Էրդողանը նշել է. «Մենք պետք է Բարձր մակարդակի ռազմավարական համագործակցության խորհրդի նիստն անցկացնեինք Բաքվում, սակայն ահաբեկչությունից հետո նախագահ Իլհամ Ալիևն առաջարկեց նիստն անցկացնել Անկարայում։ Այդ քայլը կարևոր է Թուրքիայի ու Ադրբեջանի համատեղ պայքարի տեսանկյունից։ Համարում եմ, որ դա ևս մեկ անգամ ապացուցում է հանգուցյալ Հեյդար Ալիևի «Մեկ ազգ, երկու պետություն» խոսքերի ճշմարտացիությունը։ Ադրբեջանն այն ընկերներից է, որոնց ճանաչում ես դժբախտության ժամանակ։ Ես բոլորին խորհուրդ եմ տալիս հաշվի առնել եղբայրական այս ուղերձները և դրանից եզրակացություններ կատարել»։ Էրդողանը լրագրողների հետ զրույցում հայտնել է, որ ապրիլի ժամանելու է Ադրբեջան, որտեղ մասնակցելու է միջմշակութային երկխոսության միջոցառմանը (ՄԱԿ-ի քաղաքակրթությունների դաշինքի գլոբալ 7-րդ ֆորումին): Նա կարևորել է Թուրքիայի ու Ադրբեջանի միջև բարձր մակարդակի շփումների շարունակումը. «Բարձր մակարդակի համագործակցության խորհրդի նիստերը հերթականությամբ կանցկացվեն Թուրքիայում ու Ադրբեջանում։ Հետագայում մեր շփումները կշարունակվեն։ Ստամբուլում անցկացվելու է Իսլամական համագործակցության նիստը, որտեղ մենք նորից կհանդիպենք։ Ապրիլի 25-26-ին միջմշակութային երկխոսության միջոցառման կապակցությամբ ես կլինեմ Բաքվում։ Մենք նաև կհանդիպենք Վաշինգտոնում՝ միջուկային գագաթնաժողովի շրջանակներում»։ Ալիևը Անկարայում անցկացված Թուրքիայի ու Ադրբեջանի բարձր մակարդակի համագործակցության խորհրդի 5-րդ նիստի ավարտից հետո կազմակերպված համատեղ մամուլի ասուլիսի ժամանակ հայտարարել է, որ իրենք ձգտելու են ժամանակին իրագործել TANAP և TAP գազատարների նախագծերը։ Ալիևն ընդգծել է, թե հավատում է, որ իրենք երկու տարի անց նշելու են TANAP գազատարի բացումը։ Խոսելով Ղարաբաղյան հակամարտության կարգավորման մասին՝ Էրդողանը հայտարարել է, որ իրենք այդ հարցում աջակցել և աջակցելու են Ադրբեջանին։ Իսկ Ալիևը Թուրքիային շնորհակալություն է հայտնել Ղարաբաղյան հակամարտության հարցում աջակցության համար։ Ապա, նա անդրադարձել է Թուրքիայի պաշտպանական արդյունաբերությանը. «Այդ ոլորտում Թուրքիայի հաջողություններն ամրապնդում են Ադրբեջանի պաշտպանական պոտենցիալը»։ Թուրքիայի և Ադրբեջանի համագործակցությունն աստիճանաբար կխորանա, ասել է Ադրբեջանի նախագահ Իլհամ Ալիևը` հավելելով. «Մեր համագործակցությունը խորանում է, զարգանում, և այսօր այն հասել է ռազմավարական գործընկերության մակարդակի: Այսօր Թուրքիան և Ադրբեջանն իրար ամենամոտ երկրներն են համաշխարհային մասշտաբով»: Ալիևն ընդգծել է, որ երկրներն իրականացնում են լուրջ գործունեություն շատ ոլորտներում. «Մեր համագործակցությունը անվտանգության, ահաբեկչության դեմ պայքարի, էներգետիկայի, տրանսպորտի, ռազմական, ռազմատեխնիկական ոլորտներում ունի հրաշալի պատմություն, և ես վստահ եմ, որ այդ համագործակցությունն աստիճանաբար կխորանա»: Թամար Բագրատունի